Солонгос улсад визийн хугацаа нь дууссан 22 настай монгол иргэн баригдсан талаар тус улсын MBC телевиз мэдээлжээ. Түүнийг гадаад иргэдийг орогнуулах байранд түр хорихдоо хоёр настай хүүг нь хамт байлгасан гэх хэрэг шүүмжлэл дагуулаад байна.
Тэд 19 хоног хоригдохдоо өөр улсын танихгүй хүмүүстэй хамт байсан. Бяцхан хүүд зурагт ширтэх, хувцасны шүүгээгээр тоглохоос өөр хийх зүйл байгаагүй аж. Том хүнд өгдгийн адил хоол өгч, халуун ногоотой учир сайн ч идэж чаддаггүй байжээ. Хүүгийн аав “Хүүхэд балчир учраас их айсан. Хүмүүсийн хурхирах чимээнээр унтаж ч чадаагүй” хэмээн ярьсан байна.
Хүүхдийн эцэг эх гурван жилийн өмнө БНСУ-д аялахаар очсон бөгөөд тухайн үед хүүгийн ээж тус улсад амаржжээ. Нярайн уушгины өвчнийг эмчлүүлэхийн тулд буцалгүй үлдсэн бөгөөд эмчилгээний зардлыг олохоор аав нь ажил хийж эхэлсэн байна. Өнгөрсөн дөрөвдүгээр сард тэрээр жолоо үнэмлэхгүй барьж яваад баригдаж, хүүтэйгээ ийнхүү хоригджээ.
Хүүхдийн биеийн байдал муудсан тул тэднийг орогнох байрнаас гаргасан байна. Харин Хууль зүйн яамнаас тэднийг буцаах гэсэн боловч эцэг нь эсэргүүцсэн тухай тус сайтад мэдээлжээ. Мөн хүүхдийг асаргаанд авах танил тал байгаагүй аж. Иймд хүүхдэд гурван удаа эмнэлгийн тусламж үзүүлсэн байна. Түүнчлэн байх хугацаанд нь тоглох гар утас, зургийн дэвтэр зэргээр хангасан талаар мэдэгджээ.
Эцэг хүү хоёр 19 хоногийн турш хоригдож албан шаардлагаар нутаг буцсан. Хэргийн талаар И Ил хуульч “Хүүхдийг хорьж болно, болохгүй гэсэн тусгай заалт байдаггүй. Үндэсний хорооноос гадаад гэр бүлийг хамгаалах арга хэмжээнүүдийг авах санал тавьсан ч 13 жил хэрэгжээгүй” гэсэн байна.
Эх сурвалж: MBC
