Элсэлтийн ерөнхий шалгалт өнөөдөр /2023.06:15/ орон даяар 10:00 цагт түүх, англи хэлний хичээлээр эхэлж байна.
Энэ жил 34 мянга 432 шалгуулагч бүртгүүлснээс 2023 онд 12 дугаар анги төгсөж буй 30 мянга 744 хүүхэд байгаа бол өмнөх оны 3688 шалгуулагч байна. 2023 онд 3290 шалгуулагч цахим хүсэлт илгээснээс 3100 шалгуулагчийн хүсэлт баталгаажиж, үлдсэн шалгуулагчдын шалгалтын гэрчилгээний хүчинтэй хугацаа дууссан тул татгалзсан хариу илгээжээ.
Энэ жилийн ЭЕШ-ын дүн оноог блокчейн системд суурилсан байдлаар гаргана гэдгийг Боловсролын үнэлгээний төвийн дарга Д.Ганбат хэлж байлаа.
Тэрбээр "Дүн оноо нэгтгэгдэн автоматаар блокчейн системд байрших ба цаг хугацаа, орон зай үл хамааран, хүний оролцоогүй, нэгэнт байршсан бол хэдэн зуун жил болсон ч дата нь устахгүй найдвартай, хөндлөнгийн нөлөөгөөр өөрчлөлт хийх боломжгүй гэх мэт давуу талтай.
Хамгийн олон шалгуулагч сонгосон хичээл нь математик буюу 23634 байна. Мөн
- Англи хэл 21976
- Нийгэм судлал 20712
- Монгол хэл 12754
- Физик 9141
- Биологи 6860
- Хими 6878
- Түүх 1686
- Газарзүй 1085
- Орос хэл 1014 шалгуулагч тус тус өгөхөөр сонгожээ.
Шалгалт өгөхөөр очихдоо Бүртгэлийн хуудас, суудлын хуваарь, Иргэний үнэмлэх болон түүнтэй адилтгах баримт бичиг, /Иргэний үнэмлэх авах насанд хүрээгүй буюу 2023 оны 06 дугаар сарын 01-ний өдрөөс хойш 16 насанд хүрэх шалгуулагч сурч буй сургуулийн захирал эсвэл өөрийн оршин сууж буй орон нутгийн Засаг даргын гарын үсэг, тамгаар баталгаажсан, цээж зурагтай тодорхойлолт, төрсний гэрчилгээний хамт авч ирнэ./ Бүрэн дунд боловсролын үнэмлэх, түүнээс дээш боловсрол эзэмшсэнийг гэрчлэх баримт бичиг зэргээ марталгүй авч очно.
