Засгийн газраас энэ оны төсвийн хуульд өөрчлөлт оруулж, цалин тэтгэвэр нэмэхээр болсон. Цалин, тэтгэврийн нэмэгдлийг ирэх сарын 1-ээс олгож эхлэх юм.
Нийт ахмадын тэтгэвэр 10 хувиар нэмэгдэх бол үүнээс гадна итгэлцүүрээр нэмэгдүүлэх юм. Итгэлцүүрээр тэтгэврийг нэмэхэд нийт ахмадын гуравны нэг нь хамрагдана гэдгийг Хөдөлмөрийн нийгмийн хамгааллын сайд Х.Булгантуяа мэдээлсэн.
Мөн ахмадууд тэтгэвэр нь хэдээр нэмэгдэх вэ гэдгийг цахимаар шалгах боломжтой болох юм байна. Тодруулбал, иргэн өөрийн овог, нэр, регистрийн дугаараа оруулаад тэтгэвэр нь хэдээр нэмэгдэхийг харах боломжийг бүрдүүлэхээр ажиллаж байгаа аж.
ХНХ-ын сайд Х.Булгантуяа хэлэхдээ "Итгэлцүүрээр нэмж, тэтгэврийн зөрүүг арилгана гэдгийг бид бараг 10 жилийн дараа хийж байна. Хамгийн сүүлд 2014 онд ингэж ахмадын тэтгэвэр нэмсэн байдаг. Итгэлцүүрээр нэмнэ гэдэг нь тухайн үеийн таны авч байсан цалинг өнөөдрийн цалинтай дүйцүүлж, үржүүлдэг тоог хэлдэг. 1990-ээд онд дундаж цалин 500 төгрөг орчим байлаа гэхэд үүнийг 2060-аар үржүүлж байж өнөөдрийн цалинтай дүйцүүлж байна гэсэн үг. Тэгэхээр итгэлцүүр бол таны цалинг инфляцад идэгдэхгүй байхаар өнөөдрийн цалинтай дүйцүүлж боддог аргачлал. Гэхдээ хүн бүхний тэтгэвэр итгэлцүүрээр нэмэгдэхгүй. Нийт тэтгэвэр авагчдын гуравны нэг нь л итгэлцүүрээр тэтгэвэр нь нэмэгдэхээр харагдаж байна. НДЕГ манай тэтгэвэр авагчдын мэдээлэл байдаг. Үүнтэй уялдуулаад иргэн та өөрийнхөө овог, нэр, регистрийн дугаарыг оруулахад таны тэтгэвэр хэрхэн яаж нэмэгдэх вэ гэдгийг харж болно. Ахмадууд өөрийн мэдээллээ оруулаад тэтгэврээ хэрхэн нэмэгдэхийг харж болдог болно гэсэн үг. Мөн харьяа газрынхаа нийгмийн даатгал дээр очоод тооцуулж болно. Бид нэг бүрчлэн тооцооллуудыг нь нийгмийн даатгалын систем дээрээ хийгээд явж байна. Тун удахгүй ил болгоно. Ил болгосны дараа ахмадууд цахимаар тэтгэврийн нэмэгдлээ шалгаж болно" гэлээ.
