ОХУ-ын Батлан хамгаалахын сайд Сергей Шойгугийн хүү, 22 настай Данил Шебунов Украины тусгай ажиллагаанд оролцоогүй. харин тэрээр энэ үеэр дуучин болох карьераа эхлүүлэхээр шийдсэн гэж Алексей Навальныйгийн багийнхан тогтоожээ.
Шебунов бол Шойгугийн гэр бүлээс гадуурх гурван хүүхдийн нэг бөгөөд түүний ээж Елена Шебунова (Каминскас) цагтаа онгоцны үйлчлэгчээр ажиллаж байжээ. Шойгугийн нууц хүү Рубловка дахь "Ерөнхийлөгчийн" элит сургуулийг төгссөн бөгөөд тус сургууль жилийн хоёр сая рублийн төлбөртэй аж. Шебунов 19 настайдаа бизнесмэн болсон, Москвагийн төвд оффисын хоёр барилгатай, түүнийгээ түрээслүүлдэг.
Мэргэжлийн хөлбөмбөгчин болохоор төлөвлөж байсан Шебунов Украинд дайн эхлэхээс хэдхэн хоногийн өмнө Sheba хэмээх нууц нэрээр хөгжмийн карьераа эхлүүлж байгаагаа зарлажээ. Тэрээр 2-р сарын 24-нд алдартай дуунуудын ковер бүхий видеогоо Тик ток-д нийтэлж байв.
Улмаар дөрөвдүгээр сард дуучин анхныхаа клипний зураг авалтад зориулж кастинг зарласан бөгөөд Sheba англи хэл дээр дуулжээ.
Өнгөрөгч есдүгээр сард Орос даяар зарласан дайчилгаанаас дөрөв хоногийн өмнө Шебунов НАТО-гийн гишүүн Турк руу явж, тэнд далайд амарч буй бичлэгээ байршуулжээ.
Шойгугийн хүү ярилцлагандаа зөвхөн англи хэл дээр дуу бичдэгээ дурдаад түүний нэг зорилго бол "дэлхийн тавцанд гарах" юм гэжээ.
Эх сурвалж: Мoscowtimes.ru
