УИХ-ын чуулганы нэгдсэн хуралдаан үргэлжилж байна. Үдээс өмнө Үндсэн хуулийн цэцийн хоёр дүгнэлтийг хэлэлцсэн юм.
Одоо АХБ-наас авах зээл буюу 2022-2023 оны хөтөлбөрийг хэлэлцэж байна. Ингэснээр манай улс тус банкнаас 655 сая ам.доллар буюу 2.2 их наяд төгрөгийн хөнгөлөлттэй зээл авах эрх үүсэх юм.
УИХ хөтөлбөрийг баталсны дараа АХБ-ны удирдлагууд батлах шаардлагатай юм байна. Зээлийг дэд бүтцийн төслүүд (150 сая ам.доллараар баруун бүсэд авто зам барина. Тодруулбал Завхан-Говь-Алтай аймгийг холбоно), сургууль цэцэрлэгийн хүртээмж нэмэх (10 сая ам.долларыг 5 байршилд зарцуулна)-эд зарцуулна. УИХ-ын гишүүн С.Ганбаатар, Ц.Сандаг-Очир нар зээл авч, Засгийн газрын өрийг нэмж байгааг эсэргүүцэв. Сангийн сайд улсын төсөвт хөрөнгө оруулалт тусгаагүй тул энэ зээлийг авах шаардлагатай гэв.
Харин УИХ-ын гишүүн Б.Энхбаяр 10 сая ам.доллараар таван байршилд сургууль цэцэрлэг барих юм байна. Энэ мөнгө хүрэлцэх үү? Учир нь 640 хүүхдийн суудалтай сургууль манай тойрогт буюу Баянзүрх дүүргийн 26-р хороонд сургууль барихад олон тэрбум төгрөгийн төсөв шаардлагатай. Иймд сургууль, цэцэрлэгийн хүртээмжээ нэмэх үү гэж асуув.
Тус хорооны хүүхдүүд гурван км алхаж, сургуульд явдаг байна.
БШУ-ны сайд Л.Энх-Амгалан “Нийслэлд 17 сургуульд гурван ээлжээр хичээллэж байна. Нэг ангид 50-60 хүүхэд сурч байна. Цаашид нэг 45 хүүхэд л сурах ёстой. Зарим сургуулийн давхрыг нэмнэ. Шинээр сургууль барихад цаг их орж, хугацаа алддаг. 26-р хорооны сургуулийг ирэх 10 сарын 1-нд ашиглалтад оруулна. Энэ сургуулийн ажил яагаад удсан гэхээр хувийн газар дээр шугам сүлжээгээ татсан. Яам, нийслэлтэй, гүйцэтгэгчтэй хамтран шийдэх олон ажил байв. Нийслэлд цэцэрлэгийн хүртээмж харьцангуй сайжирсан. ” гэв.