Засгийн газрын тусгай сангуудаас идэж уусан улс төрчдийн нэрс УИХ, Засгийн газрын түвшнээс бууж, дүүргийн ИТХ руу орж ирлээ. Нийслэлийн Баянгол дүүргийн Иргэдийн төлөөлөгч Б.Ууганцэцэг 2017 онд хадам ээж Д.Дэлгэрмаагийнхаа “Шимдөл” компаниар Жижиг дунд үйлдвэрлэл хөгжүүлэх сангаас 210 сая төгрөг зээлээд эргүүлж төлөөгүй баримт ил болов.
“Шимдөл” компани нь цайны газар, хагас боловсруулсан бүтээгдэхүүн үйлдвэрлэх зориулалтаар байгуулагдсан бөгөөд ЖДҮХС-гийн зээлээ “Мах, махан бүтээгдэхүүн үйлдвэрлэх” зориулалтаар авсан байна.
Мөн уг компанийн эцсийн өмчлөгчийн талаарх мэдээлэл үгүй байгаа нь сонирхол татаж байгаа юм.
Энэ зээл олгогдсоноос хойш өдгөө зургаан жилийн хугацаа өнгөрсөн ч есөн сая төгрөг л төлөгдөж, “Муу зээл”-ийн ангилалд багтжээ.
Тухайн үед Б.Ууганцэцэгийн үеэл ах П.Сэргэлэн нь ХХААХҮ-ийн сайдаар ажиллаж байсан бөгөөд дүүдээ “Ямар ч хамаагүй бэлэн төсөл аваад ир” хэмээгээд авчирсных нь дараа зориулалтыг нь өөрчилж, улмаар зээл гаргаж өгсөн гэсэн мэдээлэл байгаа юм.
Б.Ууганцэцэгийн тухайд, 2020 онд БГД-ийн ИТХ-д МАН-аас нэр дэвшиж сонгогдсон. ИТХ-ын дарга Б.Сэмжимаагийн фракцын хүн гэх бөгөөд улс төрд орохоосоо өмнө дүүргийн намын хороонд санхүүгийн дэмжлэг үзүүлдэг байсан гэх.
Харин зээл авч өгсөн гэх үеэл ах П.Сэргэлэн нь эдүгээ Кувейт улсад Элчин сайдаар сууж байгаа юм.
Эх сурвалж: Zuv.mn