Засгийн газрын өнгөрсөн дөрөвдүгээр сарын хуралдаанаар Улаанбаатар хотын авто замын түгжрэлийг бууруулах хүрээнд авто зам, замын байгууламжийг барьж байгуулахад нэн шаардлагатай 187 тэрбум төгрөгийн санхүүжилтийг Засгийн газрын бонд болон бусад эх үүсвэрээр шийдвэрлэх боломжийг судалж танилцуулахыг Сангийн сайд Б.Жавхланд даалгаж байв.
Тэгвэл Б.Жавхлан сайд түгжрэлийг бууруулахад нэмж зарцуулах 187 тэрбум төгрөгийг шийдвэрлэх боломжийг эрэлхийлж сүйд болсон ч үгүй. Хүүхдийн мөнгийг бүх хүүхдэд олгох, төрийн албан хаагчдын суурь цалинг нэмэгдүүлэх зэрэг ирэх сонгуульд зориулсан шийдвэрүүдтэй зэрэгцүүлэн мөнөөх түгжрэлийн 187 тэрбум төгрөгийг шийдвэрлэхээр төсвийн тодотголд тусгаад байна.
Уг нь засгаас түүнд өгсөн даалгаврын агуулгыг харахаар санхүүжилт босгох олон боломжуудаас оновчтойг нь сонгохыг л даалгасан байгаа юм. Хэдийгээр төсвийн орлого энэ оны эхний дөрвөн сард өмнөх оноос ахиухан өсөлттэй байгаа ч дөрөвдүгээр сарын орлогын өсөлт өмнөх гуравдугаар сараасаа буурсан дүнтэй байна лээ.
Ер нь бол ирэх саруудад төсвийн орлого дандаа өсөлттэй гарна гэх баталгаа байхгүй. Тийм байхад төлөвлөснөөс давж ирсэн орлогоо юу юугүй үрэн таран хийх гэж адгаж байгаа нь үнэндээ энэ засгийг, Сангийн яамыг муухай харагдуулж байна.
Б.Жавхлан сайд хэлэхдээ, Төсвийн алдагдал буурч, валютын нөөц нэмэгдсэн. Гадаад өрнөөс шалтгаалсан дефолт болох эрсдэлээс бүрэн ангижирлаа. Эхний улирлын байдлаар 36 сая тонн нүүрс экспортолно гэж тооцоолж байсан бол өнөөдрийн байдлаар 60 хувийг буюу 19.6 сая тонн нүүрс гаргаад байна. Төсвийн орлогын 36 хувь нь эхний улиралд биелсэн . Экспортыг эрчимжүүлэх, гадаад валютын нөөцийг нэмэгдүүлэх, эдийн засгийг сэргээхэд чиглэсэн арга хэмжээний үр дүнд бий болсон орлогоор хүүхдийн мөнгийг хүсэлт гаргасан хүүхэд бүрт олгох, сүүлийн 6 сарын мөнгийг нөхөж өгөх, цалин, тэтгэвэр нэмэх эдийн засгийн боломж бүрдлээ гээд байгаа.
Зүй нь эдийн засгийн өнөөгийн энэ харьцангуй ая таатай нөхцөл байдлыг үүлэн чөлөөний нар гэж харж, дараа дараагийн эрсдэлүүдийг тооцох нь засаг төрийн анхаарах хийх ёстой ажил л даа. Гэтэл манай эрх баригчдын хувьд орж ирсэн дээр нь үрээд цацаад дахиад асуудал үүсэхэд юу ч үгүй байж байдаг, тиймээс төсвийн алдагдал буюу өрөө л нэмэгдүүлдэг уламжлал тогтсон. Үүнийгээ ч энэ удаад давтсан хандлага гаргаж байна.
А.МӨНХ
