KPMG: Ойрын 5 жилд эрдсийн гарцад 5G сүлжээ, хайгуулын шинэ технологи нөлөөлнө.
Олон улсын уул уурхайн салбарынхан цэвэр эрчим хүч гарган авах эрдэс бүтээгдэхүүний хэрэгцээг урт хугацаанд хангаж чадна гэсэн өөдрөг төсөөлөлтэй байгааг “KPMG”-ийн судалгаа харууллаа. Судалгаанд уул уурхай, металлын салбарын 430 гаруй удирдах албан тушаалтан хамрагджээ.
2015 оны Парисын хэлэлцээрийн хүрээнд улс орнууд 2050 он гэхэд хүлэмжийн хийн ялгаруулалтыг тэглэх зорилт тавиад байна.
Газрын ховор элементүүд нь цэвэр эрчим хүч гарган авах технологийн шилжилтийг хурдасгах гол цөмд тооцогдож байгаа юм. Ингэснээр ирэх 20 жилд эдгээр эрдэс бүтээгдэхүүний эрэлт эрс өсөх төлөвтэй байгаа аж.
Хэдий тийм боловч “KPMG”-ийн судалгаанд хамрагдсан удирдах албан тушаалтнуудын дийлэнх нь буюу 79 хувь нь “Урт хугацааны эрэлт хэрэгцээг уул уурхайн салбар хангаж чадна гэдэгт бүрэн итгэлтэй байна” гэж хариулжээ.
Судалгаанд оролцсон удирдлагуудын 33 хувь нь зэс олборлолт, 20 хувь нь хөнгөн цагаан, 18 хувь нь ган үйлдвэрлэлийн чиглэлд үйл ажиллагаа эрхэлж байна.
Үүнээс гадна ирэх таван жилийн хугацаанд өсөн нэмэгдэж буй эрдсийн нийлүүлэлтэд 5G сүлжээ, хайгуулын шинэ технологи нөлөөлөх бол металлын гарцад хиймэл оюун, дата шинжилгээ нөлөөлөх төлөвтэй гэж салбарынхан үзэж байна.
