Монгол Улс Уур амьсгалын өөрчлөлтийн конвенцын Үндэсний дөрөвдүгээр тайлангаа эцэслэж байна. Тайлангаар 1990-2020 оны хүлэмжийн хийн ялгарлын тооллогыг танилцуулах гэнэ.
Монгол Улс 2023 оны гуравдугаар сард НҮБ-ын Ази, Номхон далайн эдийн засаг, нийгмийн комисс, НҮБ-ын Байгаль орчны хөтөлбөртэй хамтран Цэвэр агаар өндөр түвшний форумыг Улаанбаатар хотноо зохион байгуулсан аж. Энэхүү форум нь агаарын бохирдлын эсрэг шинэлэг шийдэл, шилдэг туршлагыг солилцох, тэр дундаа бүс нутгийн хамтын ажиллагааг бэхжүүлэх, бодлого, мэдээллийн технологийн хэрэгцээг тодорхойлох боломжийг бүрдүүлжээ. Улаанбаатарт болсон форумаар Агаарын бохирдлын эсрэг бүс нутгийн үйл ажиллагааны хөтөлбөрийг хэрэгжүүлэх үндэс суурийг тавьж, бүс нутгийн хамтын ажиллагааны чиглэл, хэлбэрийг тодорхойлсон аж.
2023 онд Монгол, Японы Хамтарсан кредит олгох механизмын хамтарсан механизмын 10 жилийн ой тохиож байгаа бөгөөд сэргээгдэх эрчим хүчний салбарт нийт 130 гаруй сая ам.долларын хөрөнгө оруулалтаар төсөл хэрэгжүүлж байна хэмээн Байгаль орчин, аялал жуулчлалын яамнаас мэдээлэв.
Хамтарсан кредит олгох механизмыг амжилттай хэрэгжүүлсэн туршлагад үндэслэн энэ онд “Монгол Улсын Засгийн газар, БНСУ-ын Засгийн газар хоорондын уур амьсгалын өөрчлөлтийг сааруулахад хамтран ажиллах тухай суурь хэлэлцээр”-т гарын үсэг зурсан. Цаашлаад энэ чиглэлээр Сингапур Улстай хамтран ажиллах тухай санамж бичигт ойрын хугацаанд гарын үсэг зурахаар төлөвлөжээ.
Олон улсын хувьд, 2021 онд Монгол Улс Монреалийн протоколд оруулсан Кигалийн нэмэлт өөрчлөлтийг соёрхон баталж, хөгжлийн түншүүдтэй хамтран үндэсний чадавхыг бэхжүүлэх үйл ажиллагааг хэрэгжүүлж байна. Бидний хүчин чармайлт Богино хугацаатай уур амьсгалын бохирдуулагчийг (SLCP) бууруулах дэлхийн зорилтуудад хувь нэмэр оруулна гэж үзэж буй аж.
Түүнчлэн Монгол Улс “Дэлхийн метан хийн амлалт”-д нэгдэн орсон бөгөөд Уур амьсгал ба цэвэр агаарын холбоотой хамтран уг амлалтыг хэрэгжүүлэх үйл ажиллагааны төлөвлөгөөг боловсруулахад бэлэн гэв.
