![](http://hardnews.mn/wp-content/uploads/2022/05/5f8913f97e2d7.jpeg)
УИХ-ын хаврын чуулганы нэгдсэн хуралдаан эхэлж байна. Энэ үеэр Монгол Улсын Ерөнхийлөгч У.Хүрэлсүх хүнсний аюулгүй байдал, хангамжийн талаар мэдээлэл хийлээ. Тэрбээр, "Улс орны нийгэм, эдийн засгийн аюулгүй байдлыг хангах зорилгоор халамжаас хөдөлмөрт, олборлолтоос боловсруулалтад, импортоос экспортод шилжих суурь реформын хүрээнд "100 жил 10 зорилт хөгжлийн санаачилга"-ыг төрийн тэргүүн дэвшүүлсэн.
Дээрх 10 зорилтын нэг болох "Хүнсний аюулгүй байдлыг хангах, хүнсний бүтээгдэхүүнээр дотоодын хэрэгцээгээ бүрэн хангаж, мал аж ахуй, газар тариаланг эрчимжүүлэн хөгжүүлж, бүс нутагтаа органик хүнс экспортлогч орон болох" зорилтыг ханган хэрэгжүүлэхэд та бүхний анхаарлыг хандуулахаар миний бие чуулганд оролцож байна.
Монгол Улсын үндэсний аюулгүй байдал нь Монгол хүний аюулгүй байдалтай шууд холбоотой асуудал. Хүнээ хамгаалъя, хүнээ хөгжүүлье гэвэл хүнсээ бид өөрсдөө бэлдэх ёстой.
Өнөөдөр дэлхийн зах зээл дээр хүнс болон бордооны үнэ сүүлийн 14 жилийн хугацаанд дахь хамгийн өндөр хувиар өслөө. Ялангуяа үр тариа, ургамлын тосны үнэ огцом өсч, бага орлоготой иргэдийн амжиргаа, хүнсний ауюлгүй байдалд ноцтой эрсдэл учруулж байна. Сүүлийн 15 сарын хугацаанд ХАА-н бүтээгдэхүүний үнэ дэлхийн зах зээл дээр 43 хувиар, түүний дотор үр тарианы үнэ 56 хувиар өслөө. Харин сүүлийн 3 сарын хугацаанд бордооны үнэ 20 хувиар өссөн байна" гэв.