Засгийн газрын хуралдаанаас гаргасан шийдвэрийг танилцуулж байна.
Сангийн сайд Б.Жавхлан "Өнгөрсөн гурван жилийн хугацаанд ковидын хүнд үеийн сорилтыг даван
туулж ирсэн. Эхний хоёр жилд тодотгол хийж байсан. Гэхдээ тэр үед төсвийн орлого бүрдэлт,
хүндрэлтэй нөхцөл байдлаас болж, төсвийн алдагдлыг нэмэгдүүлж, ковидын хүнд үеийн зардлыг
санхүүжүүлж ирсэн. Гэсэн ч Засгийн газраас шат дараатай арга хэмжээ авсан учир эдийн засаг
тогтворжсон.
Энэ удаагийн төсвийн тодотголыг дараах таван эдийн засгийн ангилал дээр хийж байна.
Төрийн алба хаагчдын суурь цалинг нэмэгдүүлэхэд 986.6 тэрбум төгрөг зарцуулна. Үүнд 217.7
мянган төрийн алба хаагчид хамрагдана.
Тэтгэврийн зөрүүг арилгана. Дараа нь үнийн өсөлттэй уялдуулж, 10 хувиар нэмэгдүүлнэ. Үүнд
394.6 тэрбум төгрөг зарцуулна. 496.3 мянган тэтгэвэр авагч хамрагдана.
Хүүхдийн мөнгөн тэтгэмжийг хүсэлт гаргасан хүүхэд бүхэнд өгнө. Мөн өнгөрсөн зургаан сарын
мөнгийг нөхөж олгоно. Үүнд 167.2 тэрбум төгрөг зарцуулна.
Түүнчлэн нийслэлийн замын түгжрэлийг шийдэхэд тодорхой мөнгө төсөвлөнө. Мөн нийгмийн
халамжийн хэмжээг өсгөнө.
Өөрөөр хэлбэл, нийт нэг их наяд 825.2 тэрбум төгрөгийн төсвийн тодотгол хийнэ. Энэ нь нэг сая иргэн
шууд хамрагдсан төсвийн тодотгол болно" гэв.
