Гол нэрийн барааны дундаж үнэ өмнөх сараас 8.7 хувиар, өмнөх долоо хоногоос 1.2 хувиар өсжээ. Түүнчлэн ямааны ястай махны үнэ хамгийн их нэмэгдсэн байна. Өнгөрсөн долоо хоногт ямааны ястай махны үнэ дунджаар 11 664 төгрөгийн үнэтэй байсан бол өнөөдөр 12 658 төгрөг болж өсжээ. Харин хонины махны үнэ өмнөх долоо хоногоос бараг 500 төгрөгөөр өсөж, 16 533 төгрөг болжээ.
Уг үзүүлэлтийг дөрөвдүгээр сартай харьцуулахад 2500 төгрөгөөр өссөн дүн юм. Үхрийн цул махны үнэ килограмм нь өмнөх долоо хоногоосоо 352 төгрөгөөр нэмэгдэж, 21 852 төгрөг болов. Өөрөөр хэлбэл, үхрийн цул мах өмнөх сартай харьцуулахад 4000 орчим төгрөгөөр нэмэгджээ.
Мөн байцай, хүрэн манжин, сонгино зэрэг хүнсний ногооны үнэ өмнөх долоо хоногоос 150-234 төгрөгөөр нэмэгдсэн байна.
Харин энэ долоо хоногт задгай сүүний нэг литрийн үнэ 47 төгрөгөөр, өндөгнийх 13 төгрөгөөр буурчээ.