БНАСАУ АНУ-ын цэргийн үйл ажиллагааг хянах зорилгоор анх удаа тагнуулын хиймэл дагуул хөөргөсөн ч амжилтгүй болж, далайд унажээ. Умард Солонгос хиймэл дагуул хөөргөх оролдлого амжилтгүй болсныг батлаад ойрын хугацаанд хоёр дахь оролдогоо хийнэ гэж мэдэгдлээ.
Умардын зүгээс пуужин хөөргөсөн нь Окинава арлын оршин суугчдыг сэрэмжлүүлэхэд хүргэсэн боловч Японы нутаг дэвсгэр дээгүүр пуужин нисэж өнгөрөхгүй нь тодорхой болсны дараа аюулгүй байдлын сэрэмжлүүлгийг цуцалжээ. Лхагва гарагийн өглөө түгшүүрийн дуут дохиогоор сэрсэн Сөүлийн иргэд багагүй үймэж, сандралджээ. Умард Солонгос хиймэл дагуул хөөргөсний дараа Сөүлд 06:32 цагт түгшүүрийн дохио дуугарч, иргэдийг нүүлгэн шилжүүлэлтэд бэлдэхийг анхааруулсан байна. 20 минутын дараа нүүлгэн шилжүүлэлтийн талаарх мэдээлэл илгээсэн нь алдаа болохыг зарлажээ.