Зөрчлийн бүртгэл, мэдээллийн нэгдсэн систем энэ оноос ажиллаж эхлэхээр болсон. Хууль зүй, дотоод хэргийн сайдын 2020 оны А/208 дугаар тушаалаар “Зөрчлийн бүртгэл, мэдээллийн сан”-г ашиглаж эхлээд буй.
Өнгөрсөн хавраас эхлэн алба хаагчдын дунд Зөрчлийн хэргийг шалгах, шийдвэрлэх эрх бүхий байгууллага, албан хаагчдад зориулсан хэрэг бүртгэх, шалгах үйл ажиллагааг хэрхэн цахимаар шийдвэрлэх талаар сургалтууд явагдаж буй. ХЗДХЯ-аас энэхүү сангийн үйл ажиллагааг явуулж эхлэхтэй холбогдуулан ХЗДХЯ-аас ТАВАН тэрбум төгрөгийг зарцуулахаар төлөвлөжээ. Х.Нямбаатар сайдын зүгээс энэхүү сан нь энэ оны нэгдүгээр сараас эхлэн ашиглалтад орно хэмээн мэдэгдэж байсан. Харин яг одоогоор энэхүү санг хэрхэн ашиглах талаар сургалтуудыг алба хаагчдад зориулан хийх ажил үргэлжилж байгаа аж.
Энэхүү үйл ажиллагааны хүрээнд өнгөрсөн сард Зөрчлийн бүртгэл, мэдээллийн нэгдсэн системд холбогдох дэд бүтцийн техник, тоног төхөөрөмжийг худалдан авах болон программ хангамжийг боловсруулах тендер зарласан байна. Уг тендерийн төсөвт өртөг 1,3 тэрбум төгрөг байгаа юм. Харин үлдсэн ДӨРВӨН тэрбум төгрөгийг хэрхэн захиран зарцуулж байгаа талаар Шилэн дансандаа мэдээлээгүй байна.
