Газрын тосны бүтээгдэхүүн боловсруулах тусгай зөвшөөрөлтэй нэр бүхий компани Дорноговь аймгийн Замын-Үүд суманд шинээр үйлдвэр ашиглалтад оруулах гэж буй аж. Үйлдвэрийг ашиглалтад оруулах туршилтын ажлын явцад техникийн хий алдсан, улмаар сумын оршин суугчдад үнэртсэн гэх мэдээлэл цахим орчинд цацагдаад байна.
Энэ талаар ЦЕГ-аас тодруулахад “Олон нийтийн сүлжээнд цацагдсан мэдээллийн дагуу шалгалтын ажиллагааг явуулж байна. Одоогоор тус сумын эмнэлэгт хордсон гэх хүн үйлчилгээ аваагүй, мэдээлэл бүртгэгдээгүй байна” гэлээ.
Тус компани нь 2002 онд байгуулагдан гадаад худалдаа, олон улсын тээвэр зуучлал, 2015 оноос газрын тосны импорт, бөөний борлуулалт, 2017 оноос газрын тосны бүтээгдэхүүн боловсруулах, үйлдвэрлэх чиглэлээр үйл ажиллагаа явуулж байгаа аж. Газрын тосны бүтээгдэхүүний үйлдвэр нь Дорноговь аймгийн Замын-Үүд сумын нутаг дэвсгэрт байрладаг бөгөөд 2019 онд Стандарт хэмжил зүйн газраас А-80, А-92 бензин, дизелийн түлш үйлдвэрлэх тохирлын гэрчилгээ авчээ.
