Теsla компанийн гүйцэтгэх захирал Илон Маск хиймэл оюун ухааныг хүн төрөлхтөнд заналхийлэхүйц цэрэг, батлан хамгаалахын зорилгоор ашиглах магадлалтай хэмээн таамаглал дэвшүүлээд зогсохгүй үүнд төрийн зохицуулалт шаардлагатай хэмээн өөрийн байр сууриа илэрхийлжээ.
Тэрээр орон нутгийн цагаар 23-ны өдөр Их Британийн нийслэл Лондон хотноо зохион байгуулагдсан Wall Street Journal сонины "Гүйцэтгэх захирлуудын зөвлөлийн дээд хэмжээний уулзалт"-д оролцох үеэрээ “Хиймэл оюун ухааны хөгжил нь хэдийгээр хүн төрөлхтөнд олон боломж бололцоог нээж өгөх нь үнэн боловч хүн төрөлхтнийг устгах эсвэл хүний төрөлхтөний өсөлтийг хязгаарлах зорилгоор ашиглагдах эрсдэлтэй” хэмээн мэдэгдсэн байна.
"Улс орнуудын засгийн газар хиймэл оюун ухааныг юуны түрүүнд цэрэг, батлан хамгаалахын салбарт ашиглах болов уу гэж би бодож байна. Хиймэл оюун ухаан нь тулалдааны талбарт ямар ч хүнээс илүү хурдан хариу үйлдэл үзүүлэх чадвартай ба ирээдүйд дрон ашиглах чадвартай улс орнуудын хооронд дайн дэгдсэн тохиолдолд тэр нь “дроны дайн" байх магадлалтай” хэмээн тэрээр онцлон тэмдэглэв.
Үүний зэрэгцээ “Хүн төрөлхтөнийг устах магадлал бага боловч бүр огт байхгүй гэсэн үг биш юм” гээд хиймэл оюун ухааныг төрөөс зохицуулахыг уриалсан болохыг гадаадын хэвлэл мэдээллийн хэрэгслүүд дурджээ.
Эх сурвалж: MBC