Боловсролын зээлийн сангийн зээлд хамрагдсан хүмүүсийн дийлэнх нь улстөрчид, тэдний хүүхдүүд, хамаарал бүхий этгээдүүд байсан нь ил болж, олон нийтийн бухимдал, шүүмжлэл дээд цэгтээ хүрээд байна.
Тус сангийн мэдээлэл ил болохоос өмнө буюу 2022 оны нэгдүгээр сараас Авлигатай тэмцэх газрын алба хаагчид БЗС-д үзлэг, шалгалт хийж байжээ. Тухайн шалгалтаар БЗС-аас “хувь иргэний данс руу шилжүүлэг хийсэн” хэд хэдэн тохиолдол илэрсэн бөгөөд энэ нь “авлигын эрсдэл бий болсон” гэдгийг харуулж, АТГ удирдамж гарган, дахин шалгалт оруулжээ.
Удирдамжийн хүрээн дэх шалгалтаар нийт 17 иргэний хувийн данс руу шилжүүлэг хийсэн нь тогтоогдсон байна.
Иймээс уг зөрчлийг арилгуулахаар БЗС-ийн удирдлагад хугацаатай зөвлөмж хүргүүлсэн боловч заасан хугацаанд зөрчлөө арилгаагүй тул уг шалгалтын дүн, дүгнэлтийг Засгийн газрын хэрэг эрхлэх газарт, Боловсрол шинжлэх ухааны яаманд мөн хүргүүлсэн байна.
Өөрөөр хэлбэл, БЗС-д бугласан асуудлыг салбар яам, Засгийн газар бүтэн жилийн өмнөөс мэдэж байсан ч дорвитой арга хэмжээ авалгүй өнөөдөрт иржээ.
Зургийн тайлбар: АТГ-аас ЗГХЭГ, БШУЯ-нд хүргүүлсэн зөвлөмж
Тухайн шалгалтаар 900 орчим зээлдэгчийн мэдээллийг хамруулан шалгасан бөгөөд уг зээлүүдтэй холбоотой бусад баримт, мэдээллийг гаргаж өгөхийг хүсэхэд БЗС-ийн дарга Д.Гарди “устгагдсан, алга болсон. Албан бичгээр хандчих, хуулийн хугацаанд хариу хүргүүлнэ” гэх байдлаар асуудлыг сунжруулсаар ирсэн гэх мэдээлэл байгаа юм. Ийм учраас Д.Гардид холбогдуулан АТГ хэрэг үүсгэн, шалгаж эхэлжээ.
Тухайн шалгалтаар сангийн хөрөнгийг хувь иргэний данс руу шилжүүлсэн зөрчлөөс гадна УИХ-аар хэлэлцүүлэн тогтоол гаргуулалгүйгээр зээлдэгч нарын зээлийг сайдын тушаалаар чөлөөлсөн зөрчлүүд ч олон илэрч байжээ.