Л.Энх-Амгалан сайд аа, пиараа багасгаад зээлийн сангаа эрүүлжүүлэх үүргээ биелүүл!
Боловсролтой, ес зүйтэй, эрүүл иргэдтэй улс орны өмнө хөгжил дэвшлийн олон гарц тодорхой байдаг. Манай нийгмийн тухайд үнэн хэрэгтээ хүний хөгжил гэх ойлголт ихэд хойгуур эрэмбэлэгдэж өдийг хүрсэн учраас өнөөдрийн дүр зураг ийм тааруу байгаа хэрэг л дээ. Нэг үеэ бодвол сүүлийн үед хүний хөгжил, хүүхэд залуусын суурь боловсролын талаар арай илүү агуулга талаас нь ярьж хэлдэг болсон ахицтай талууд бий.
Тухайлбал, Боловсролын сайд Л.Энх-Амгалан боловсролын чанарын ялгааг арилгах тал дээр дорвитой анхаарч, өөрчлөлтийн алхмууд хийж эхэлсэн. Тэрбээр “Хот, хөдөөгийн болон хувийн, төрийн сургуулийн ялгааг арилгах хамгийн зөв шийдлийн нэг бол цахим шилжилт. Хаана сурч, амьдарч байгаагаасаа үл шалтгаалан хамгийн сайн багш, хамгийн сайн суралцахуйн платформоор биеэ даан суралцах боломжийг хүүхэд бүрд олгох ёстой. Энэ хүрээнд өнгөрсөн намрын болон хаврын улирлаас эхлэн бид хэд хэдэн дэлхийд тэргүүлдэг платформыг хот, хөдөөгийн сургуулиудад туршиж байна” хэмээн саяхан мэдэгдэнэ лээ. Сайд ийнхүү салбарынхаа талаар сайн мэдээ дуулгаж буй ч анхаарах ёстой асуудлууд энэ салбарт цөөнгүй байгааг бид харж байгаа.
Өдгөө нийгмийн халуун сэдэв болоод буй Боловсролын зээлийн сангийн хөрөнгө мөнгөний зарцуулалтыг ил тодоор ярьж буй салбарын сайдын өөрийнх нь хамаарал бүхий этгээдүүд ч хилийн чинадад зээлээр сурсан нь саяхнаас тодорхой болчихлоо.
Ёстой нөгөө сайн ч хүн байдаггүй, муу ч хүн байдаггүй гэдэгчлэн асуудал ярьж шүгэл үлээж байгаа хүмүүсээс өөрсдөөс нь асуудал үүсэхээр нэг талаас нийгэмд эргэлзээ бий болоод буй.
Гэхдээ Боловсролын зээлийн сангийн асуудлыг нөгөө талаас нь авч үзвэл ийм сан улс оронд хэрэгтэй юу гэвэл, тийм. Гол нь сангийн хөрөнгийн зарцуулалт шударга байх ёстой. Тэтгэлэг, зээл авах болзол шалгуурыг хангасан олон залуус энэ сангийн дэмжлэгээр боловсрол эзэмшсэн биз. Мөн тэдгээр залуустай ижил тооны хүмүүс эрх мэдэл нөлөөллийн хүчээрээ энэ сангийн хөрөнгөөр дэмжүүлчихсэнд асуудлын гол байгаа.
Тиймээс засгийн зүгээс оновчтой маневр хийж, энэ санг гажуудуулсан алдаа завхралыг засаж эрүүлжүүлэх шаардлагатай. Улсаа хөгжүүлэхийн тулд хүнийхээ боловсролыг төрийн бодлогоор дэмжих хэрэгцээ нэгэнтээ байгаа учраас боломжийг шударгаар олгодог тогтолцоог Боловсролын зээлийн сан болон бусад тусгай сангуудын үйл ажиллагаанд нутагшуулах ёстой юм. Түүнчлэн Боловсролын зээлийн сангийн үйл ажиллагааг эрүүлжүүлж, тэтгэлэг, зээл жинхэнэ хэрэгтэй шаардлагатай байгаа хэсэгт очдог байх тогтолцоог бүрдүүлэх үүрэг салбарын сайд Л.Энх-Амгаланд ногдож байна.
Мөн боловсролын салбарт анхаарах ёстой асуудлууд цөөнгүй бий нь Ерөнхий сайдын энэ долоо хоногт боловсролын салбарынхантай хийсэн уулзалтаас тодорхой харагдана лээ. Тухайлбал, Боловсролын гүйцэтгэлийн үнэлгээний аргачлалыг чанаржуулах, залуу багш нарыг бодлогоор дэмжих, түрээсийн болон ипотекийн орон сууцанд хамруулах боломж бүрдүүлэх, багш бэлтгэх тогтолцоонд анхаарах, сурах бичгийн агуулга, уялдаа холбоог сайжруулах, эцэг эхийн хариуцлагыг нэмэгдүүлэх шаардлагатай байгааг багш нар хэлж байсан. Багш нарын санал, хүсэлтэд дурдагдсан оюутан-багш бэлтгэх, цалингийн нэмэгдлийг шийдвэрлэх, орон сууцны зээлийн хүүг бууруулах, түрээсийн орон сууцанд багш нарыг хамруулах, боловсрол олгох ялгавартай байдлыг арилгах, залуу багш нарын нийгмийн асуудлыг шийдвэрлэх зэргийг цогцоор нь тусгасан багшийн хөгжлийг дэмжих хөтөлбөрийг шуурхай боловсруулж, 14 хоногийн дотор Засгийн газарт танилцуулахыг Ерөнхий сайд холбогдох албан тушаалтнуудад үүрэг болгосон юм.
Тэгэхээр Л.Энх-Амгалан сайдын өмнө хийх ёстой ажлууд олон байна. Ер нь бол түүний хувьд асуудлын голыг барьж авдаг ч, үнэн хэрэгтээ пиараа хэтрүүлчих гээд байгаа нь анзаарагдах болсон. Сүр нь ихдээд ирэхээр үйлдэл нь бүдгэрээд, хойно нь чирэгдээд байдаг гэмтэй. Тиймээс боловсролын салбарынхаа асуудлыг дорвитой шийдэх гэж буй л юм бол хувь тоглолт хийхээсээ татгалзах хэрэгтэй, Л.Энх-Амгалан сайдын хувьд. Сонгууль угтсан энэ нэг жилд Боловсролын зээлийн сангийнхаа алдаа гажуудлыг нухацтай авч үзэх нь түүний хувьд гол үүрэг ачаа нь болоод буйг дахин тодотгоё.
Н.ЧИНЗОРИГ
