Хөдөлмөр эрхлэлтийг дэмжих сангаас зээл авсан 7666 иргэний 18 тэрбум төгрөг хугацаа хэтэрсэн ангилалд байна
Хөдөлмөр эрхлэлтийг дэмжих санд 2022 онд нийт 59 тэрбум 947 сая 100 мянган төгрөгийн орлого төвлөрсөн бол 73 тэрбум 838 сая 600 мянгыг зарлага гарчээ.
Засгийн газрын “Шил” ажиллагааны хүрээнд өнөөдөр Хөдөлмөр эрхлэлтийн сангийн мэдээллийг нийтэд ил болгосон бөгөөд 2012 оноос хойг нийт 737 тэрбум 11 сая 800 мянган төгрөгийн орлого төвлөрсөн бол нийт 628 тэрбум 797 сая 200 мянган төгрөгийн зарлага гарч 1 сая 834 мянга 332 иргэн энэ сангийн зээлд хамрагдан одоогоор 58 тэрбум 251 сая төгрөгийн зээл төлөгдөөгүй байгаа аж.
Хөдөлмөр эрхлэлтийг дэмжих сангийн орлогын 62.76 хувь буюу 462 тэрбум 588 сая 700 мянган төгрөг нь гадаадын иргэдийг гэрээгээр ажиллуулсан ажил олгогчийн төлөх ажлын байрны төлбөрөөс бүрдсэн бол 16.14 хувь буюу 118 тэрбум төгрөг нь төсвөөс хуваарилсан мөнгөн хөрөнгө байгаа юм. Харин 8.27 хувьтай тэнцэх 60 тэрбум 930 сая төгрөг нь санхүүгийн дэмжлэгийн эргэн төлөгдсөн хөрөнгө бол хөгжлийн бэрхшээлтэй хүнийг ажиллуулаагүй аж ахуйн нэгж байгууллагаас 34 тэрбум төгрөгийн орлого оржээ.Тэгвэл зарлагын дийлэнх хувийг буюу 24.25 хувь болох 152 тэрбум 486 сая төгрөгийг Мэргэжлийн боловсрол, сургалтыг дэмжих санд хуваарилах суралцагчдын тэтгэлэгт зориулжээ.
Жиг зээл болон дотоодын эх үүсвэрээс олгосон зээлд 124 тэрбум 124 сая төгрөг зарцуулсан бол аж ахуй эрхлэлтийг дэмжих хөтөлбөрт 85 тэрбум 938 сая төгрөг зарцуулсан байгаа юм.
Тус сангаас зээл авсан 7666 иргэний 18 тэрбум 113 сая төгрөг хугацаа хэтэрсэн зээлийн ангилалд, үүнээс 9.2 тэрбум төгрөгийн зээл хууль шүүхийн шатанд байгаа аж.
Хачирхалтай нь, 69 хүн сураггүй алга болсон ангилалд орсон бөгөөд тэдний зээлийн дүн 227 сая төгрөг байна. Хууль шүүхийн шатанд байгаа зээлийн хэмжээгээр нийслэлд Баянзүрх дүүрэг 952 сая төгрөгөөр тэргүүлж байгаа бол аймгуудаас Дорнод 939 сая, Баян-Өлгий 926 сая, Ховд 864 сая, Завхан 823 сая, Өвөрхангай 779 сая төгрөгийн зээлийн үлдэгдэлтэй байгаа аж.
Үйлдвэр, хөдөө аж ахуйн яамны төслийн 14 тэрбум төгрөгийн зээл хэвийн бус
Хөдөлмөр эрхлэлтийг дэмжих сангийн санхүүжилтээр Хөдөлмөр, халамж үйлчилгээний ерөнхий газраас нийт 25 тэрбум 840 сая төгрөгний зээл олгосноос 8,7 тэрбум төгрөгийн зээл л эргэн төлөгдсөн бол 17,1 тэрбум төгрөгийн зээлийн үлдэгдэл байгаа аж. Энэхүү зээлийн дийлэнх буюу 14 тэрбум төгрөг нь хуучнаар Үйлдвэр хөдөө аж ахуйн яамны “Сурагчдын дүрэмт хувцсыг үндэсний үйлдвэрүүдээр үйлдвэрлүүлэх төсөл”-ийн хэвийн бус зээл аж. 2010 онд тус төсөлд нийт 17 тэрбум төгрөгийн зээл олгосноос ердөө 2,5 тэрбум төгрөг нь төлөгдөж, 14.4 тэрбум төгрөгийн зээл төлөгдөөгүй байна.
Үүнээс гадна чөлөөт үлдэгдэл хэлбэрээр Капитал банкинд байршиж байсан 7 тэрбум төгрөгөөс 1.3 тэрбум нь төлөгдөөгүй аж.
Хөгжлийн бэрхшээлтийн хүний хөдөлмөр эрхлэлтийн ерөнхий газраас 2.3 тэрбум төгрөгийн зээл олгосон байна
Хөгжлийн бэрхшээлтэй хүний хөдөлмөр эрхлэлтийн ерөнхий газраас нийт 2.3 тэрбум төгрөгийн санхүүжилтийг 102 зээлдэгчид олгосон бөгөөд 422 сая төгрөг нь төлөгдөж, 1.9 тэрбум төгрөгийн үлдэгдэлтэй байгаа аж. Нийт 84 зээл хэвийн ангилалд, таван зээл бүрэн төлөгдсөн бол 13 зээл хэвийн бус ангилалд шилжжээ. Хэвийн бус гэх 13 зээл нь бүгд 2019 онд олгосон байгаа юм.
