Каннын олон улсын кино наадмын хүрээнд манай улс анх удаа “Монгол өдөрлөг” үйл ажиллагааг амжилттай зохион байгууллаа. Тус өдөрлөгийн хүрээнд Каннын олон улсын кино наадамд дэлхийн өнцөг булан бүрээс хүрэлцэн ирсэн кино бүтээгчид болон Монгол улсыг төлөөлөн оролцож буй уран бүтээлчдийг урьж оролцуулсан юм. Зочдод Монгол орны соёл уламжлал, үндэсний урлагийн тоглолтуудаас толилуулсан бөгөөд Засгийн газраас “Монголд зочлох жил” болгон зарласантай холбогдуулан зураг авалт хийхэд тохиромжтой байгалийн өвөрмөц тогтоц бүхий байршлуудыг танилцуулжээ. Энэ хүрээнд гэрэл зурагчин Г.Ган-Өлзийн “Байгалийн хөдөлгөөнт гэрэл зургийн үзэсгэлэн”-г толилуулсан байна.
Мөн Франц улсад ажиллаж, амьдарч буй Монгол уран бүтээлчид тус үйл ажиллагаанд оролцож, морин хуур, уран нугаралтын үзүүлбэр, уран бичлэгийн үзүүлбэр зэргийг зочдод сонирхуулсан байна. Үйл ажиллагааны хүрээнд залуу найруулагч П.Золжаргалын “Баавгай болохсон” уран бүтээл энэ удаагийн Каннын олон улсын кино наадмын “Un Certain Regard” хэсгийн өрсөлдөөнт шатанд шалгарсан мэдээг зочдод зарласан ба тус киноны анхны үзвэр кино наадмын үеэр тавдугаар сарын 21-ний өдөр “Debussy” театрт зохион байгуулагдсан юм.
