Бүгд Найрамдах Франц Улсын Ерөнхийлөгч Эммануэл Макрон Монгол Улсад төрийн айлчлал хийхээр өнөөдөр ирж байна. Тус улсаас Төрийн тэргүүний түвшинд хийж буй анхны түүхэн айлчлалын Монгол Улсын Ерөнхийлөгч Ухнаагийн Хүрэлсүх, Бүгд Найрамдах Франц Улсын Ерөнхийлөгч Эммануэл Макрон нар албан ёсны хэлэлцээ, уулзалт хийж хоёр орны харилцааг шат ахиулах, хамтын ажиллагааг өргөжүүлэх, эдийн засаг, хөрөнгө оруулалтыг нэмэгдүүлэх чиглэлээр болон олон улсын харилцааны зарим асуудлаар ярилцах аж. Мөн хоёр улсын харилцааг ногоон эрчим хүч, зам тээвэр, эрүүл мэнд, хөдөө аж ахуй, соёл, боловсрол, хүмүүнлэг зэрэг салбарт тэлж, харилцан ашигтай хамтарсан төслүүд хэрэгжүүлэх талаар санал солилцоно.
Уулзалт, яриа хэлэлцээний үеэр “Хүнсний хангамж, аюулгүй байдал”, “Тэрбум мод” үндэсний хөдөлгөөн, “Ерөнхийлөгчийн илгээлт 2100” хөтөлбөрийн хүрээнд Францын талтай хамтран ажиллах талаар мөн ярилцаж, хэлэлцээний дүнгийн талаар хэвлэлд мэдээлэл өгнө хэмээн албан мэдээлэлд дурджээ.
Тэгвэл Елисейн ордноос гаргасан мэдээлэлд "Ерөнхийлөгч Эммануэль Макрон Японд болж буй Их долоогийн дээд хэмжээний уулзалтын дараа Монгол улсад айлчилна. Ням гарагт тэрбээр сүүлийн хэвлэлийн бага хурлынхаа дараа Улаанбаатар руу нисэж, Ерөнхийлөгч Ухнаагийн Хүрэлсүхийн хамт оройн зоог барих болно" гэжээ. Ерөнхийлөгч нар харилцаа хамтын ажиллагааны асуудлаар ярилцсаны дараа Чингис хааны музейг үзэж сонирхох бөгөөд музейн цуглуулгын тодорхой хэсгийг ирэх 10 дугаар сард Францын Нант хотын түүхийн музейд дэлгэх юм.
Долоо хоног тутмын Le Point сонин Макроны ойрын эх сурвалжаас эш татан бичсэнээр Франц улс энэхүү айлчлалыг геостратегийн чухал асуудал гэж үзэж буй. Парис гадаад бодлогын хувьд авторитар дэглэм бүхий хоёр том их гүрний дунд орших ардчилсан улс гэдэг утгаар Монгол Улстай харилцаагаа бэхжүүлэх, атомын эрчим хүчний тэргүүлэгч гүрний хувьд цэвэр эрчим хүчний чиглэлээр хамтрах, олон улс, бүс нутгийн аюулгүй байдал, олон улсын харилцааны дэг журамд нэгдмэл байр суурьтай гэдгээ харуулахыг зорьж байгаа юм.
