Ээжүүдийн төлөөлөл хүүхдийн мөнгөний талаар ХНХ-ын сайд Х.Булгантуяад шаардлага хүргүүлж буй талаар мэдээлж байна.
Ээжүүдийн төлөөлөл иргэн н.Отгонцэцэг:
"Би зохих журмын дагуу хороон дээр очиж өөрийнхөө асуудлыг тодруулсан. "Таны хувьд манайхаас шалтгаалах зүйлсийг бид хийсэн. Цааш нь хандаарай" гэсэн. 1111 төв рүү байнгын гомдол өгөхөд ХНХЯ-наас хариу өгөхгүй байна, гомдол хүлээж авахгүй байна гэж хэлсээр өдийг хүрсэн. Би 1-р сарын 16-наас хойш өнөөдрийг хүртэл явж байна.
E-Mongolia-гаас "Нийгмийн халамжийн дэмжлэг шаардлагатай" гэсэн тодорхойлолт гарсан. Энэ тодорхойлолтоо үндэслээд явж байна. Би охинтойгоо хоёулаа амьдардаг. Хүүхдийн мөнгө амьдралд хэрэгтэй. Ядаж л энэ мөнгийг хүүхдийнхээ сургалтын төлбөрт өгөх боломжтой" гэлээ.
Ээжүүдийн төлөөлөл "Би 1-р сарын 16-наас хойш өнөөдрийг хүртэл явж байна. Би хүүхдийн мөнгөнөөс хасагдаад би өөрөө болон миний төлөөлж байгаа 9000 гаруй ээж хасагдаж, нэмэгдэж өнөөдрийг хүртэл явж байна.
Би халамжийн яамны гадна зургаа дахиа ирж байна. Надтай мэргэжилтнүүд, хүүхдийн мөнгөний бодлого төлөвлөлтийн газрынхан уулзсан. Дэд сайд хүртэл бид УИХ-д өргөн барина гэж хариу өгсөн. Би Үндсэн хуулийн цэцэд өргөдлөө гаргасан. Дунд суудлын хуралдаан зарласан боловч шийдвэр гаралгүй өнөөдөр хүрлээ. Цэц хүртэл хурлаа хойшлууллаа. Ямар үндэслэлээр хурлаа хойшлуулж байна вэ? Би хөлөө хүрэх газраа явлаа. Ганцхан хүүхдийн мөнгөний хурлыг хойшлуулсан. Бусад бүх асуудлыг шийдчихлээ.
Би Х.Булгантуяа сайдад шаардлага хүргүүлж байна. Шаардлагын хоёр заалт тусгасан.
Нэгдүгээрт, 9 хувь гээд ялгасан байгаа иргэдэд цалингийн орлоготой, эгэл жирийн ажилтай залуусыг хассан. Ихэвчлэн ганц хоёр хүүхэдтэй өрхийг хассан байна. Мөн өрх толгойлсон, өвчтэй, хөгжлийн бэрхшээлтэй хүүхдүүдтэй хүмүүсийг хассан байна. Зөвхөн хөрөнгө орлогын үзүүлэлтээр хассан. Тиймээс зайлшгүй шаардлагатай авах ёстой хүүхдүүдэд энэ мөнгийг олгож өгөөч гэсэн шаардлага тавьж байна. Гол нь өнгөрсөн саруудын мөнгийг нөхөж олгохыг шаардаж байна.
Хоёрдугаарт, ямар үзүүлэлтээр 91 хувьд нь мөнгө олгож байгааг бид мэдмээр байна.
Өнөөдөр 18-ны өдөр хүүхдийн мөнгийг олгож байгаа юм байна. Өнөөдөр хүсэлт гаргасан бүх хүүхдэд олгоосой. Өнөөдөр мөнгө орохгүй бол би жагсаал цуглааны хэмжээнд ормооргүй байна. Үнэхээр орохгүй бол жагсаал зохион байгуулах хүсэлт тавих байх.
Надтай хамт 5000 гаруй ээж байна. Энэ ээжүүд бүгд аваагүй. Зарим нь төрийн албан хаагч, ажлаа хийж байгаа, эсвэл хүүхдээ харж байгаа энд ирэх боломжгүй ээжүүд байна. Би өнөөдөр шийдвэр гарахаас нааш эндээс явахгүй" гэв.
