УИХ, Засгийн газрын гишүүн асан, Хотын ерөнхий менежер асан Т.Бадамжунайгийн туслахаас НИТХ-ын дарга хүртэл эвтэйхэн дэвшиж яваа МАН-ын залуу боловсон хүчний нэг Ж.Батбаясгалангийн нэр сүүлийн хэдэн өдөр багагүй дуулиан шуугиантай холбогдож эхлэв.
Даваа гарагт ЦХХХ-ны сайд Н.Учрал 2000 оноос хойшхи Нийслэлийн Засаг дарга нарын газар олголтын мэдээллийг олон нийтэд ил болгосныг зарласан.
М.Энхболд, Э.Бат-Үүл, Г.Мөнхбаяр, С.Батболд, Д.Сумъяабазар гээд үргэлжлэх жагсаалт дунд Ж.Батбаясгалангийн нэр ч байсан. Түүний гарын үсгээр 66 газрын зөвшөөрлийн гэрчилгээ гарсан байгаа юм. Тиймээс Ж.Батбаясгалан Нийслэлийн Засаг даргаар ажиллаж байсан уу, газрын гэрчилгээнд гарын үсэг зурдаг уу гэх асуултууд гарч ирсэн юм. Нийслэлийн Засаг даргаар ажиллаж байсан С.Амарсайхан 2020 оны УИХ-ын сонгуульд нэр дэвшихээр 2020 оны зургадугаар сарын сүүлээр ажлаа өгсөн байдаг. Ингээд НИТХ-ын даргаар ажиллаж байсан Ж.Батбаясгалан Нийслэлийн Засаг даргыг түр орлон гүйцэтгэгчээр ажиллаж байгаад 2020 оны аравдугаар сарын 23-ны өдөр Д.Сумъяабазарт хүлээлгэн өгчээ. Ингээд тооцвол, Нийслэлийн Засаг даргын албан үүргийг 4 сарын хугацаанд түр орлон гүйцэтгэсэн байгаа юм. Газрын 66 зөвшөөрлийг энэ хугацаанд л олгожээ. www.shilen.gov.mn сайтын мэдээллээр 2020 оны 10 дугаар сарын 21-ний өдөр нийт 38 газар олголтын зөвшөөрөлд гарын үсэг зуржээ. Цэцэрлэг, дулаан гээд төрийн байгууллагад өгсөн газрын зөвшөөрлөөс гадна амины орон сууцных нь харагдсан. Тэгэхээр Ж.Батбаясгалан “гарын үсэг”-ээ Д.Сумъяабазарт хүлээлгэж өгөхөөсөө өмнө боломжоороо амжуулсан харагдав. Хэрвээ хүссэн бол газрын зөвшөөрөлд нэр холбогдохгүй байх боломж түүнд байсан уу гэвэл байсан. Гэсэн ч 66 зөвшөөрөлд гарын үсэг зураад амжсан.
МАН-ын хувьд НИТХ-ын сонгуулийн гол пиар, уриа нь “Утааг ялав, түгжээг тайлна” гэх Ж.Батбаясгалангийн цав цагаан цамц өмсөөд нүүрс атгасан зураг байсныг уншигчид санаж буй нь лав.
Тэгвэл “Эрдэнэс Тавантолгой” ХК-ийн удирдлагуудын нүүрсний хулгайн гэх хэргийн авлигын мөнгөнүүд “Тавантолгой Түлш” ХХК-аар дамжин гадагш гарсан гэх мэдээлэл гараад буй. Гэтэл “Тавантолгой Түлш” ХХК-ийн байгуулагдсан цагаас нь л ТУЗ-ийн даргаар НИТХ-ын дарга Ж.Батбаясгалан ажилласан байдаг. Одоо ч www.shilen.gov.mn сайтад “Тавантолгой түлш” ХХК-ийн ТУЗ-д Ж.Батбаясгалангийн нэр хэвээр бий. Тэгэхээр тухайн компаниар дамжин 6 сая ам.доллар гадагшилж байхад огт мэдээгүй байна гэвэл ёстой том эндүүрэл биз.
Ж.Батбаясгалангаас гадна “Тавантолгой түлш” ХХК-ийн захирлаар ажиллаж байсан, өдгөө ТУЗ-ийн гишүүн, БОАЖ-ын дэд сайд М.Ганбаатар ч нэр цэвэр үлдэх аргагүй.
Нүүрсний гэх хэрэгт гол холбогдогч болж, авлигын мөнгөөр Казахстанд хороолол бариулсан хэмээн ангайлгаж буй “Эрдэнэс Тавантолгой” ХК-ийн удирдлагын багийн нэг гишүүн Х.Нурлат ч “Тавантолгой түлш” ХХК-ийн ТУЗ-д байсан учраас 6 сая ам.долларын асуудал ТУЗ-өөс гадуур өнгөрнө гэж баймгүй.
