Нэмэгдсэн өртгийн албан татварын 2023 оны нэгдүгээр улирлын төлбөрийн баримтыг дөрөвдүгээр сарын 8-ны 23:59 цагаас өмнө амжиж бүртгүүлэн буцаан олголтын урамшууллаа авахыг Татварын ерөнхий газраас мэдээлсэн. Тэгвэл 2023 оны эхний улирлын НӨАТ-ын буцаан олголтыг дөрөвдүгээр сарын 28-ны баасан гарагаас олгож эхэлнэ гэсэн.
Гэвч одоо хүртэл зарим иргэний дансанд нэгдүгээр улирлын НӨАТ-ын урамшууллын буцаан олголт ороогүй байна. Иргэд энэ оны нэгдүгээр сарын 1-нээс гуравдугаар сарын 31-ний худалдан авалтын баримтаа “Ebarimt” системд бүртгүүлж, буцаан олголт авах байсан. Тодруулбал, татвар төлөгч 1,143,309 иргэнд 69.2 тэрбум төгрөгийн урамшуулал олгох юм.
Нэгдүгээр улирлын буцаан олголт яагаад саатсан талаар Татварын ерөнхий газрын лавлах утас 18001288 залгахад “Энэ сардаа багтаж орно” гэв. Нэмэгдсэн өртгийн албан татварын буцаан олголтыг 2020 оноос эхлэн улирал бүр олгохоор болсон билээ. “Ebarimt” системд бүртгүүлсэн мэдээлэл НӨАТ-ын тухай хуулийн 5.1 дэх заалтыг хангасан эсэхийг Татварын албанаас хянаж дуусаад, ажлын хоёр хоногт багтаан Сангийн яам руу шилжүүлэх аж. Сангийн яамнаас Төрийн сангийн буцаан олголтын тусгай данс руу ажлын 20 хоногт багтаан санхүүжилтийг өгдөг. Үүний дараа Төрийн сан ажлын гурав хоногт иргэдийн данс руу шилжүүлэх юм.
