Улаанбаатар хотын өнөөгийн нөхцөл байдал, утаа, түгжрэл, хөрсний бохирдол зэрэг тулгамдсан асуудлууд нэг хоёр жилийн дотор бий болоогүй нь үнэн. Гэхдээ энэ нь өнөөдрийн төр засгийнхны хувьд өөрсдийгөө өмгөөлөх, уснаас хуурай авч гарах үндэслэл дандаа байгаад байх нь утгагүй.
Яах гэж ард түмний өмнөөс эрхийг чинь хэрэгжүүлье гэж төрд гардаг юм, ордонд суудаг юм бэ. Тулгамдсан асуудал бүрийг шийдвэрлэх гэж л хариуцлага үүрч байгаа хэрэг шүү дээ.
Тэгвэл ажил үүрэгтээ энэ талаас нь хандах бус өмнөх алдаануудыг дурдаад, тоочоод сууж байдаг нэг сайд энэ Засгийн газарт байна. Түүнийг Ц.Даваасүрэн гэдэг. Өмнө нь Эрчим хүчний сайд байсан тэрбээр энэ удаад Барилга хот байгуулалтын яамыг удирдаж буй. Өмнөх хариуцсан салбартаа өөдтэй өөрчлөлт дагуулаагүй гэх шүүмжийг чуулганы танхимд нэг бус удаа сонсож байсан тэрбээр энэ удаад ч барилгын салбарт олигтой юм хийж чадахааргүй л харагдаад байгаа.
Ямартаа л гэр хорооллын дахин төлөвлөлтийн ажил ахиц муутай байгаа талаар зарим гишүүд байр сууриа илэрхийлж, цаашид авах арга хэмжээнийх нь талаар асуухад Ц.Даваасүрэн сайд “Инженерийн дэд бүтэц тэр дундаа дулааны асуудал бэрхшээл учирсан учраас цаашдаа орон сууц барих хүнд болсон. Тиймээс эрчим хүчний хангамжийг нэмэгдүүлэх шинэ үүсвэрийг бүтээн босгохгүйгээр орон сууц барих боломж хязгаарлагдаж байна” гэсэн хариултыг өгнө лээ.
Уг нь Барилга хот байгуулалтын яам энэ л асуудалд анхаарч, шийдэл гарцуудыг тодорхойлоход бусад яамдуудтай хамтран ажиллах ёстой л доо. Гэтэл байгаа байдлыг нь харахаар засгийн яамд хоорондын үйл ажиллагаанд уялдаа холбоо хэрхэн явагддаг эсэх нь үнэндээ эргэлзээ дагуулмаар. Ялангуяа Ц.Даваасүрэн сайдын хувьд өмнө нь Эрчим хүчний сайдаар ажиллаж байсан учраас эрчим хүчний хангамжийг ямар нөөц боломжоор нэмэгдүүлж болох эсэх талаар мэдээлэлтэй байх учиртай. Энгийнээр бодоход энэ нь түүнд давуу талыг олгож болохоор боловч эсрэгээрээ манай сайдад мэддэг юм үгүй бололтой. Ямартаа л барилга барих гэхээр эрчим хүч, дэд бүтэц нь алга гээд өөрөө өмнө нь Эрчим хүчний сайд байхдаа юм хийгээгүй гэдгээ хүлээн зөвшөөрөөд сууж байх юм.
Том зургаар нь харвал барилгын салбарт тулгамдсан олон асуудал байгааг салбарынхан нь өөрсдөө хэлдэг. Гол нь тэр болгоныг өөрсдөө зохицуулчих гээд төрийн хариуцах ёстой ажлуудыг ч өөрсдөө хийчих гээд зүтгэдэг онцлог энэ салбарынханд бий. Ковидын улмаас амаргүй байдалд орсон үедээ энэ салбарын төрийн бус байгууллагууд нэгдэж Стратеги төлөвлөгөөндөө шинэчлэл хийж барилгын салбарт тулгараад байгаа 250 гаруй асуудлуудыг шинжлэн судалж, түүнээсээ 25 асуудлыг эрэмбэлэн төслийн удирдлагын зарчмаар хэрэгжүүлэх нь зүйтэй гэсэн байдлаар ажиллаж буйгаа Ц.Даваасүрэн сайдтай хийсэн уулзалтын үеэр хэлцгээж байсан.
Түүнчлэн Ц.Даваасүрэн сайдыг салбартаа байгаа бүх асуудлуудыг анхаарч, хувийн хэвшил, тэр дундаа идэвхтэй ажиллаж байгаа олон нийтийн байгууллага, мэргэжлийн холбоодтойгоо сайдаар ажиллаж байгаа хугацаандаа нэлээн гүнзгий, нягт хамтран ажиллах байх гэж найдаж буйгаа илэрхийлнэ лээ. Монголын Барилгачдын нэгдсэн холбооны Ерөнхийлөгч М.Батбаатар “Салбарын 40 гаруй Төрийн бус байгууллага байна.
Таван жилийн өмнөөс төрийн чиг үүргүүдийг хэрэгжүүлэхээр гэрээг байгуулж, өнөөдрийн байдлаар нийт 21 барилгын Төрийн бус байгууллага нь төрийн чиг үүргийг хэрэгжүүлэн ажиллаж байна… Одоо барилгын салбарт хөрөнгө оруулалт, санхүүжилтийн асуудлуудад анхаарлаа хандуулах хэрэгтэй байна” гэхчлэн сайдад хандан байр сууриа илэрхийлж байсан. Салбарынхны зүгээс энэ мэтээр барилгын сайдыг ажлаа сайн хийгээсэй гэж хүсэн хүлээж буй ч Ц.Даваасүрэн сайдын хувьд бэрхшээл тоочих нь их байна.
Н.Чинзориг
