Мьянмарын цэргийн удирдлага Ракхайн мужийг байгалийн гамшгийн бүс гэж зарлав. Тус мужийг ням гарагт Мокка хар салхи дайрчээ. Одоогоор дор хаяж зургаан хүн нас барсан нь мэдэгдэж байна.
Мокка бол энэ зууны эхэн үеэс Бенгалын буланг дайрсан хамгийн хүчтэй циклонуудын нэг бөгөөд гол хүч нь Мьянмар, Бангладешийг дайрчээ.
Бангладеш дахь дэлхийн хамгийн том дүрвэгсдийн лагерь Кокс-Базарт хар салхи азаар нөлөөлсөнгүй. Гэсэн хэдий ч 5-р зэрэглэлийн шуурга Мьянмарын эрэгт хүрч, олон зуун байшинг сүйтгэжээ.
Ракхайн нам дор газар, ялангуяа мужийн нийслэл Ситве хотын орчимд аадар бороо орж, хүчтэй салхи шуурга шуурсан байна.
Орон нутгийн оршин суугчдын хэлснээр шуурганы улмаас хотын нутаг дэвсгэрийн 90 орчим хувь сүйдсэн. Салхины хурд 209 км/цаг хүрч харилцаа холбооны шугамууд унажээ.
НҮБ-ын хүмүүнлэгийн тусламжийн алба цаг агаарын таагүй байдал, харилцаа холбоо тасалдсаны улмаас гамшгийн цар хүрээг хараахан үнэлж чадахгүй байна гэж мэдэгдэв.
Орон нутгийн эрх баригчдын мэдээлснээр нас барсан хүмүүсийн зургаа нь Ситтве хотын оршин суугчид байсан бөгөөд амиа алдсан хүмүүсийн дунд 14 настай хүү модонд цохиулсан гэж орон нутгийн хэвлэлүүд мэдээлжээ.
Хөрш зэргэлдээ Бангладеш улсад энэ циклон хөрсний гулгалт, үерийн гамшигт өртсөн ч "их хэмжээний хохирол" учруулаагүй гэж албаны хүмүүс мэдэгдэв. Хар шуурганы өмнө далайн эргийн тосгоноос 750 мянга гаруй хүнийг нүүлгэн шилжүүлжээ.
Салхины улмаас 1300 гаруй хоргодох байр, 16 лалын сүм, сургалтын төвүүд сүйдсэн гэж эрх баригчид ВВС-д мэдээлэв.
Эх сурвалж: ВВС
