Украины ерөнхийлөгч Володимир Зеленський орон нутгийн цагаар 14-ний өдөр хэлэхдээ, Барууны орнуудаас нийлүүлсэн зэвсгээр Оросын эх газар руу довтлох төлөвлөгөө огт байхгүй ба зөвхөн эзлэгдсэн газар нутгаа эргүүлэн авах "сөрөг довтолгоо" л хийх төлөвлөгөөтэй байгаа талаараа онцолжээ.
Франс Пресс агентлагийн мэдээлснээр, ХБНГУ-д айлчлал хийж буй ерөнхийлөгч Зеленський Берлин хотноо сэтгүүлчдэд хандан “Бидэнд одоогоор Оросын эх газар руу довтлох цаг хугацаа, мөнгө ч байхгүйн дээр зэвсэг ч дуусаад байна” хэмээн мэдэгдсэн байна.
АНУ-ын өдөр тутмын Вашингтон Пост сонины засгийн газрын нууц баримт бичгүүдийг иш татан мэдээлснээр, ерөнхийлөгч Зелкнський энэ оны нэгдүгээр сард зохион байгуулагдаж асан нэгэн хурлын үеэр Украины хуурай замын цэргүүд ОХУ-ын хилийн бүс дэх нэр бүхий хотуудыг эзэлж байх хооронд Оросын эх газар руу довтлох төлөвлөгөө дэвшүүлж байсан тухай мэдээлсэн юм.
Тэрээр ХБНГУ-ын канцлер Олаф Шольцтой уулзахдаа Украин улс “сөнөөгч онгоцоор дэмжлэг үзүүлэх эвсэл”-ийг байгуулахаар идэвхийлэн ажиллаж байгаагаа хэлээд Германы талаас уг эвслийн үйл ажиллагаанд дэмжлэг үзүүлэхийг хүссэн байна.
Хариуд нь канцлер Шольц тодорхой байр суурь илэрхийлээгүй бөгөөд Украины агаарын довтолгооноос хамгаалах системийг сайжруулахад анхаарч байна хэмээн хариулжээ.
Ерөнхийлөгч Зеленськийн айлчлалын өмнөхөн Герман улс 50 ширхэг танк болон хуягт машин, агаарын довтолгооноос хамгаалах систем зэрэг 2.7 тэрбум еврогоор хэмжигдэх томоохон хэмжээний нэмэлт дэмжлэг үзүүлэх төлөвлөгөөгөө зарласан юм.
Эх сурвалж: Asiae
