Өнгөрөгч амралтын өдрүүдэд болсон сонгуулиар Туркийн одоогийн Ерөнхийлөгч Режеп Эрдоган, сөрөг хүчний удирдагч Кемал Кылычдароглу нарын хэн нь ч эхний шатанд ялалт байгуулж чадсангүй. Тиймээс ялагчийг тавдугаар сарын 28-нд болох хоёр дахь шатны санал хураалтаар тодруулна. Одоогоор саналын хуудасны 99.38 хувийг тоолж дуусаад байна.
Эхний шатанд ялахын тулд нэр дэвшигч нь 50-иас дээш хувийн санал авах ёстой байв.
Олон нийтийн санал асуулгаар Кылычдароглуг тэргүүлнэ гэж таамаглаж байсан ч Эрдоган 49.42 хувийн санал авч сөрөг хүчний нэр дэвшигчийг илүүрхэв. Кылычдароглу 44.95 хувийн санал авчээ. Харин хэт барууны үзэлтэй улстөрч Синан Оган 5.20 хувийн санал авч гуравдугаарт жагсчээ.
Сөрөг хүчний нэр дэвшигч хоёрдугаар шатанд Эрдоганыг ялах магадлалтай
Хоёр дахь шатны сонгууль хоёр долоо хоногийн дараа буюу тавдугаар сарын 28-нд болно. Үүнд Эрдоган, Киличдароглу хоёр өрсөлдөх юм. Сонгуулийн өмнөхөн явуулсан санал асуулгаар сөрөг хүчний нэр дэвшигч 3-4, эсвэл бүр 7-8 хувийн саналаар хоёр дахь шатанд ялалт байгуулна гэсэн тооцоолол бий. Гэхдээ эхний шатанд Кылычдароглу Эрдоганд бараг таван хувийн санал алдсаныг анхаарах хэрэгтэй.
Одоо Эрдоган, Кылычдароглу нар өрсөлдөөнөөс татгалзсан Оганы сонгогчдын саналыг урвуулахын төлөө тэмцэх хэрэгтэй болно. Гэхдээ энэхүү консерватив улстөрч үзэл суртлын хувьд Эрдогантай ойр байсан ч түүнийг эсэргүүцэж байв. Оган өөрөө нэр дэвшигчдийн хэнийг нь дэмжихээ хараахан зарлаагүй байна.
Хоёр нэр дэвшигч сонгогчдоо хоёр дахь удаагаа сонгуульд оролцохыг ятгаж чадах эсэх нь мөн гол асуудал байх болно. Эхний шатны шатны санал хураалтын ирц 88.84 хувьд хүрч, дээд амжилт тогтоосон.
Туркийн нийгэм ямар ч байсан хуваагдах нь тодорхой байна
Хоёр дахь шатны санал хураалт ямар ч байсан Туркийн нийгэмд ноцтой хагарал үүсгэнэ. Учир нь Эрдоганыг дэмжигчид болон Кылычдароглуг дэмжигчид бараг тэнцүү байна.
Туркийн Сонгуулийн төв комиссын урьдчилсан дүнгээр Ерөнхийлөгч Эрдоганы Шударга ёс, хөгжлийн нам тэргүүтэй "Бүгд найрамдахчуудын эвсэл" 49.3% буюу парламент дахь 600 суудлын 322 орчмыг авч байгаа бөгөөд тус нам өөрөө 266 суудал авч магадгүй байна.
Харин Кемал Кылычдароглугийн тэргүүлдэг сөрөг хүчний "Үндэсний эвсэл" нь 35.19% буюу 212 орчим суудал аваад байна.
Синан Оганыг ерөнхийлөгчийн сонгуульд нэр дэвшүүлсэн “Альянс АТА” нам парламентад суудал авч чадаагүй.
Энэ нь Ерөнхийлөгчийн сонгуулийн эхний шатны сонгуультай зэрэгцэн сонгогдсон Туркийн парламентын үйл ажиллагаанд ч нөлөөлнө. Энд мөн Эрдоганы Шударга ёс, хөгжлийн нам тэргүүлсэн ч сөрөг хүчин мөн адил олон санал авч чадсан нь Ерөнхийлөгчийн сонгуульд ялагдсан ч шийдвэр гаргахад саад болох магадлал өндөр байна гэсэн үг.
Эх сурвалж: Lenta.ru
