Амралтын өдрүүдэд Украины Ерөнхийлөгч Володимир Зеленский гэнэтийн айлчлалаар Итали, Герман, Франц улсуудад очлоо. Берлинд ХБНГУ-ын канцлер Олаф Шольцтой уулзах үеэрээ цэрэг, эдийн засгийн үлэмж дэмжлэг үзүүлсэнд нь талархал илэрхийлээд, барууны орнуудын тусламжтайгаар Украин энэ оны эцэс гэхэд Оросыг ялж чадна гэж мэдэгдсэн юм.
ХБНГУ нь Киевт АНУ-ын дараа орох хамгийн их зэв зэвсэг нийлүүлэгч болоод буй. Зеленскийн айлчлалтай зэрэгцэн Германы зүгээс Украинд үзүүлэх шинэ тусламжийн багцаа зарласан. Гурван тэрбум долларын өртөг бүхий уг багцад байлдааны танк, явган цэргийн хуягт машин, агаарын довтолгооноос хамгаалах дөрвөн шинэ систем багтсан аж.
Украины цэргүүд Бахмут хотын ойролцоо 10 миль урагшилж байгаа тул ялалт байгуулах бүрэн боломжтой гэж Зеленский хэллээ. "Бид түрэмгийлэгчийн ялагдлыг энэ онд эргэлт буцалтгүй болгож чадна" гэж тэр хэлээд Германыг найдвартай холбоотон гэж тодотголоо.
Ням гарагт Зеленский Францын Ерөнхийлөгчтэй Парист оройн зоог барих үеэр Макрон Украинд хөнгөн танк, хуягт машин, цэргүүдийг сургах болон бусад тусламж зэрэг нэмэлт цэргийн тусламж үзүүлэхээ амласан юм.
