Л.Оюун-Эрдэнийн удирдаж буй Засгийн газрын зүгээс алхам тутамдаа ярьж буй үндсэн топ сэдэв бол авлигатай хийх тэмцэл. Байнга энэ талаар хэлж яриад удаа дараа ажлын хэсгүүд байгуулаад байхаар нийгмийн зүгээс ч хүлээлтээ шаардлага болгон өндөрсгөсөөр байна.
Монголчууд хэзээнээсээ "Ам алдвал барьж болдоггүй" гэж захиж сургасан уламжлалтай. Тэгэхээр уламжлалаа бодсон ч, өнөөдрийн их хүлээлт, шаардлага талаас харсан ч жилийн дараа болох УИХ-ын сонгуулиас өмнө Монгол Улс авлигын индексээ урагшлуулах ёстой.
Засгийн газар юу хэлж ярихдаа бус юу хийж гавихаа харуулах хэрэгтэй байна. Авлигын индексийг сайжруулахад олон байгууллагын оролцоо чухал ч гэлээ Хууль зүй дотоод хэргийн яам болон яамыг удирдаж буй Х.Нямбаатар сайд хэрхэн ажиллахаас хамаарах зүйлс багагүй бий.
Хэрэв 2024 оны сонгуулиас өмнө Монгол Улс авлигын индексээ ганц нэгхэн байраар биш илүү дөмөгхөн шиг овоо хэдэн байраар урагшлуулаад, хэдэн жилийн туршид мөрөөдөөд байгаа хоёр оронтой тоо руу дөхчихвөл эрх баригчид олон нийтээс гайгүй дүн авч болох юм. Эсрэгээрээ энэ жилийнх шиг дахиад тав зургаан байраар ухарчихвал дагаад нийгмийн итгэл ч алсрах төлөвтэй.
Ерөнхий сайд Л.Оюун-Эрдэнэ өнгөрсөн баасан гарагт Транспэрэнси Интернэйшнлийн үүсгэн байгуулагч Петер Айгентай уулзсан. Энэ үеэрээ, Л.Оюун-Эрдэнэ Авлигын индексийг сайжруулах ажлын хэсгийг 2021 онд Хууль зүйн сайдаар ахлуулан байгуулснаа дурдаад, Авлигын төсөөллийн индексийг хоёр оронтой тоонд оруулах, авлига үүсгэгч хүчин зүйлүүдийг шийдвэрлэх зорилттой ажиллаж байгаагаа хэлсэн байсан.
Сануулахад, хоёр жилийн өмнө Х.Нямбаатараар ахлуулсан Ажлын хэсэг байгуулсныхаа дөнгөж дараа Ерөнхий сайд Транспэрэнси Интернэйшнлийнхэнд энэ үгсээ хэлж байсан юм. Тухайн үед Транспэрэнси Интернэшнл байгууллагын зүгээс авлигын индексийг хоёр жилийн хугацаанд хоёр оронтой тоонд оруулна гэдэг амаргүй, хүнд зорилт гэдгийг Засгийн газарт хандан сануулж байлаа. Үнэхээр ч ярьсны зоргоор болчихдог зүйл биш гэдэг нь батлагдаж, Монгол Улс индексээ бүр дордуулчихсан.
Транспэрэнси Интернэшнл байгууллагаас өнгөрсөн нэгдүгээр сард танилцуулсан "Авлигын төсөөллийн индекс 2022"-т Монгол Улс 180 улс орноос 116 дугаар байрт эрэмбэлэгдэж, том зорилго тавьсан 2021 оны үеийн үзүүлэлтээс таван байраар ухарсан юм. Хоёр оронтой тоонд багтдаггүй юм гэхэд ядаж хэдэн байр урагшлах ёстой атал эсрэгээрээ нэгээр ч биш нэлээн хэдэн байр ухарсан нь Х.Нямбаатар сайдын ахалсан Ажлын хэсгийн сүр нь их л байж дээ гэж учир мэдэх хүмүүс хэлж ярьж байна. Ерөнхий сайд хоёр жилийн өмнө хэлэхдээ, Авилгатай хийх тэмцлийг улам эрчимжүүлнэ.
Монгол Улс авлигын индексээр дэлхийд 111-т эрэмбэлэгдэж байгаа нь туйлын хангалтгүй үзүүлэлт гэж байсан билээ. Гэтэл нөгөөх 111 нь бүр 116 болчихоор хангалтгүй гэж хэлэхэд ч хэцүү юм. Ерөнхийдөө бол авлигатай жил жил дамнан "тэмцэж" буй л юм бол авлигын индексийг дахин муутгах эрх энэ засагт байхгүйг хаа хаанаа мэдэж буй нь лавтай.
Х.Нямбаатар сайд ч үүний тулд дорвитой ажиллах ёстой. Хоёр жил сүр бадруулан ярьсан зорилт нь цаасан дээрээс буугаагүй тул Засгийн газар 2023 оныг Авлигатай тэмцэх жил болгон зарласан л даа. Энэ хүрээнд Авлигатай тэмцэх ажлыг хэрэгжүүлэх санал, дүгнэлт боловсруулах шинэ Ажлын хэсэг байгуулсан.
Шинэ Ажлын хэсгийг дэд сайд Б.Солонгоогоор ахлуулна гэж албаны мэдээнд дурдсан ч үнэн хэрэгтээ өнгөрсөн жилүүдэд үүргээ дутуу биелүүлсэн Х.Нямбаатар салбарын сайдын хувиар хариуцлага хүлээн ажиллах ёстой юм.
Н.Чинзориг
