Цагтаа X үеийнхэн хийгээд миллениалуудыг байлдан дагуулж байсан MTV News энтертайнмент мэдээллийн продакшн 36 жилийн дараа үйл ажиллагаагаа зогсоожээ. Үүний шалтгаан нь тус продакшныг харьяалагддаг толгой компани болох Paramount өргөн цар хүрээ бүхий орон тооны цомхотгол хийж буйтай холбоотой юм.
Paramount Медиагаас мэдээлснээр тэд АНУ дахь нийт ажилчдынхаа 25 хувийг орон тооны цомхотголд оруулж байгаа гэжээ.
Шийдвэрийн хүрээнд Paramount Медиагийн ерөнхийлөгч Крис МакКартигийн хэлснээр, “Энэ бол хүнд хэдий ч манай группийн ирээдүйн хувьд стратегийн өндөр ач холбогдолтой шийдвэр. Орон тооны цомхотголын хүрээнд зарим алба нэгжийг бүтцээс хасаж байгаа бөгөөд энэхүү арга хэмжээний дүнд бид зардлаа багасгаж, бизнесийн байгууллагын хувьд илүү үр дүнтэй ажиллах нөхцөл бүрдэх юм.
Энэ бол бидний хөнгөн хуумгай ханддаг асуудал биш. Манай баг хамт олны хувьд маш их хүсэл тэмүүлэлтэй, ажилдаа өөрсдийгөө бүхэлд нь зориулж чаддаг хүмүүс. Тиймээс ч бидний хувьд найз нөхөд, хамтран ажиллагсадтайгаа салах ёс хийх нь хэцүү байна” гэсэн юм.
Тийнхүү орон тооны цомхотгол MTV News продакшнаас гадна Comedy Central, CMT, Smithsonian, Logo, Pop TV, TV Land, Paramopunt Network зэрэг Paramount группийн хэд хэдэн сувагт нөлөөлж байгаа ажээ.
Эх сурвалж: Entrepreneur
