Пакистан улсын дээд шатны шүүх Ерөнхий сайд асан Имран Ханы баривчилгааг хууль бус гэж тогтоосноо пүрэв гарагт зарласан байна. Крикетийн спортын од тамирчин байсан Имран Ханыг авлигын хэрэгт буруутган баривчилсныг эсэргүүцсэн иргэдийн жагсаал Пакистан даяар газар авсан юм.
Эсэргүүцлийн жагсаал жагсагчид болон цагдаа нарын мөргөлдөөнөөр үргэлжилж мянга гаруй хүнийг баривчлан саатуулж, арав орчим хүн амиа алджээ. Жагсаал, цус асгаруулсан мөргөлдөөн гарсны дараа дээд шүүх шийдвэрээ гаргасан байна.
Ерөнхий сайд асны туслахуудын мэдээлснээр Имран Хан аюулгүй байдлаа хамгаалахын тулд пүрэв гарагт суллагдаагүй ба баасан гарагт олон нийтийн өмнө гарна гэжээ. Ханыг Исламабадад баривчлан саатуулахын тулд хагас зэвсэглэсэн цэргүүд цагдаагийн офицеруудын хамт яаравчлан хөдөлсөн байна. Өмнө нь олон удаа баривчлан саатуулах оролдлого хийж байсан ч Ерөнхий сайд асны дэмжигчид үй олноороо гэрийг нь хамгаалж тэмцсээр байжээ.
Имран Ханыг авлига, албан тушаалын хэдэн арван гэмт хэрэгт буруутгаж байгаа юм. Түүнийг их сургуулийн эзэмшлийн газрыг хууль бусаар барилга барихаар шилжүүлэн авсан, Ерөнхий сайдын албанд байхдаа гадны зочдод хууль бусаар бэлэг худалдсан зэрэг хэргүүдэд буруутгажээ.
