Ханиалгаж, хэвлийгээр нь өвдcөн гэх зовиуртай эмнэлэгт хандсан өвчтөний биеэс олон зуун шимэгч хорхой илэрсэн тохиолдол гарчээ.
Бразилийн Ботукату хотын нэгэн эмнэлгийн эмч, доктор Витор Борин де Соуза саяхан өөрийн нийгмийг сүлжээн дэх хаягаар дамжуулан олон нийтэд нэгэн сэрэмжлүүлгийг хүргэсэн байна. Тодруулбал ханиалгаж, хэвлий хэсгээр нь өвдсөн байдалтай эмнэлэгт хандсан өвчтөний рентген зургийг тэрээр нийтэлжээ. Гэтэл тухайн өвчтөний зовиурыг үүсгэж байсан гол шалтгаан шимэгч хорхой байсан болохыг тэрээр мөн дурдсан байна. Энэ тухай Британийн Daily Mail гэх зэрэг хэвлэл мэдээллийн хэрэгслүүд мэдээлснээр олны анхаарлыг татаад байгаа юм.
Тэгвэл уг рентген зургаас харахад хэвлийн хөндий хэдэн зуун шимэгч хорхойгоор дүүрсэн байгаа нь тод харагдах аж. Үүгээр ч зогсохгүй биеийн булчингуудад нь цагаан цэгүүд үүссэн байгаа нь шохойжиж амьгүй болсон шимэгч хорхойнууд болохыг эмч тайлбарлажээ.
"Цистицеркоз” гэж нэрлэгддэг энэ өвчин нь аливаа шимэгч хорхойн авгалдайнаас үүдэлтэй хүнийг халдварлуулдаг өвчин аж. Хүний гэдэс дотор амьдардаг шимэгч хорхойн авгалдай булчин эсвэл тархинд нэвтрэх үед зовиур илэрдэг гэнэ.
Булчин болон тархи руу нэвтэрсэн авгалдай нь арьсан дор уйланхай хэлбэртэй зангилаа үүсгэх тохиолдол ч байдаг. Энэ нь харагдах байдлын хувьд маш эвгүй байдаг ч тийм ч санаа зовоох асуудал биш аж. Харин авгалдайнууд тархи эсвэл нүдний зөөлөн эдэд хүрсэн бол энэ нь жинхэнэ асуудал үүсгэдэг байна. “Толгой, нугас, нүдний хэсэгт ямар нэгэн асуудал үүсээгүй бол эмчилгээ хийх ч бараг шаардлага байдаггүй” хэмээн Соуза эмч зөвлөжээ.
Тухайн өвчтөний тухайд тархин дахь авгалдайн байршил зэргийг тодруулахаар MRI шинжилгээний хариугаа хүлээсэн байдалтай байгаа аж. Авгалдайн байршлаас хамааран толгой өвдөх, таталт өгөх зэрэг шинж тэмдэг илэрдэг ба хэрэв эмчлэхгүй хугацаа алдсан тохиолдолд тархи усжих (гидроцефалус) зэрэг үхлийн аюултай хүндрэлүүд үүсч болдог байна.
Дэлхийн Эрүүл Мэндийн Байгууллагын (ДЭМБ) зүгээс мэдэгдэж буйгаар тархинд үүссэн авгалдайн уйланхай нь уналт таталтын гол шалтгаан болдог хэмээн тодорхойлжээ. Жилд 2.5 сая орчим хүн “Цистицеркоз” гэх энэхүү өвчнөөр өвчилдөг ба Ази, Өмнөд Америк, Зүүн Европ зэрэг хөгжиж буй орнуудад өвчлөлийн дийлэнх нь бүртгэгддэг байна.
Өвчлөл үүсгэж буй гол шалтгаан бол дутуу болгосон мах, ялангуяа гахайн махаар дамжин авгалдай хүний биед ордог аж. Түүхий махан дахь шимэгчийг устгахын тулд үхрийн махыг цельсийн 66 ба түүнээс дээш температурт, гахайн махыг 77 ба түүнээс дээш температурт хангалттай чанаж болгосон байх ёстой. Дулааны боловсруулалтыг сайтар хийснээр шимэгч хорхойг бүрэн устгах боломжтой болдог байна.
Түүнчлэн бохир заваан орчинд хоол бэлтгэх эсвэл бохир гараар идсэн тохиолдолд ч халдвар авах эрсдэл өндөр байдаг аж. Ихэвчлэн халдвартай ялгадасаар дамжин халдвар тархдаг гэж үздэг байна.
Эх сурвалж: Hankyung
