Украины Ерөнхийлөгч Владимир Зеленский мягмар гарагт Киевт хүрэлцэн ирсэн Европын комиссын тэргүүн Урсула фон дер Лейентэй Киевт "1 сая их бууны сум" нийлүүлэх талаар ярилцсанаа мэдэгдлээ.
"Европын холбоо Украинд зэвсэглэл, тэр дундаа их бууны зориулалттай 1 сая сум өгөхөд бэлэн байгаад хатагтай Урсулад талархалаа илэрхийлж байна. Үүний зэрэгцээ бид эдгээр сумыг худалдан авах, хүргэх хурдны асуудлыг хэлэлцсэн. Учир нь ийм хэрэгцээ аль хэдийн бий болсон" гэж Европын комиссын тэргүүнтэй хийсэн хамтарсан хэвлэлийн бага хурал дээр хэлсэн байна.
Зеленский хэлэхдээ, фон дер Лейентэй Европын холбооны Оросын эсрэг 11 дэх хориг арга хэмжээний тухай ярилцаж, Киев энэ хоригт цөмийн салбарын эсрэг хязгаарлалт оруулахыг хүсч байгаагаа мэдэгдсэн гэж онцолжээ.
Тэрээр Украины Европын интеграцчлалын сэдвийг дахин хөндөв. "Украины Европын холбоонд элсэх хэлэлцээг эхлүүлэх нааштай шийдвэр гаргах цаг нь болсон" гэж тэр хэлэхдээ, энэ зам дахь ахиц дэвшлийн талаар 6-р сард Киев Европын комиссоос нааштай үнэлгээ авна гэж найдаж байгаагаа илэрхийлэв.
Мягмар гарагт Украин улс Европын өдрийг анх удаа тавдугаар сарын 9-нд тэмдэглэж байгаатай холбоотойгоор Европын комиссын тэргүүн Киевт хүрэлцэн ирсэн юм.
Эх сурвалж: ИТАР-ТАСС
