Олимпийн аварга Н.Түвшинбаярт холбогдох хэргийн шүүх хурал энэ пүрэв гарагт буюу маргааш /2022.04.12/ болно. Шүүх хуралд нэр бүхий 10 гэрчийг оролцуулан хаалттай хуралдахаар шийдвэрлэсэн. Энэ талаар талийгаач Э.Энхбатын гэргий Б.Нандинцэцэг өөрийн цахим хаягт мэдээлэл оруулжээ. Тэрбээр:
"Маргааш өглөө шүүх хурал боллоо
Түвшинбаярын талаас шүүхэд нөлөөлөх гэж оролдсон байна 
Хайрт ханийг минь үнэхээр хэрцгийгээр үгүй хийчээд бас л их зоригоо шударга шүүгч хараат бусаар хэргээ шийдвэрлэхээ илэрхийлж хуульд заасны дагуу нөлөөллийн мэдүүлэг хөтөлж, нөлөөлсөн этгээдийг Цагдаагийн байгууллагаар шалгуулахаар болсон гэнэ. Шударга шүүхэд дахин би бид итгэж байна. Монголын сайхан ээжүүд эмэгтэйчүүд ханийн минь үнэнч дэмжигч нар минь цагаан сүүнийхээ дээжийг өргөөд мэддэг таринаа уншаад байж байгаарай
Үнэн хэзээд ялах ёстой" гэжээ.
Прокуророос Н.Түвшинбаярыг согтуурсан үедээ Э.Энхбатыг тодорхойгүй шалтгаанаар зодож, тархинд нь хавсарсан, олон хүнд гэмтлүүд учруулан хүнийг онц харгис хэрцгийгээр алсан, бусдын эд хөрөнгийг устгаж, гэмтээсэн буюу Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1, 17.8 дугаар зүйлийн 1 дэх хэсэгт зааснаар яллах дүгнэлт үйлдсэн байдаг.
Хуульд зааснаар түүнд 12-20 жил, эсвэл бүх насаар нь хорих ял оноох магадлалтай аж.
