Гадаад худалдааны энэ оны эхний дөрвөн сарын гүйцэтгэлийг экспортын 187 663, импортын 83 402 гаалийн мэдүүлэг, бусад эх сурвалжийг үндэслэн гаргав.
Энэ оны эхний дөрвөн сарын дүнгээр гадаад худалдааны нийт бараа эргэлт 7 744.2 сая ам.доллар болж, 2022 оны мөн үеэс 2 595.5 сая ам.доллар буюу 50 хувиар өсжээ. Экспортын дүн импортын дүнгээс 2 423.5 сая ам.доллараар давж, гадаад худалдааны баланс эерэг гарлаа.
Экспортод 5 083.8 сая ам.долларын бараа, түүхий эд гаргасан нь өнгөрсөн оны мөн үетэй харьцуулахад 81хувиар өссөн байна. Экспортод нийлүүлсэн барааны 99 хувийг валютын төлбөртэй худалдаа эзэлж байна (Хавсралт 1).
Экспортын барааны нийт дүнд
- Эрдэс бүтээгдэхүүн 4506.9 сая ам.доллар буюу 88.7 хувь;
- Сувд, үнэт ба хагас үнэт чулуу, үнэт металл, гоёлын зүйлс, зоос 208.9 сая ам.доллар буюу 4.1 хувь;
- Ургамлын гаралтай бүтээгдэхүүн 100.1 сая ам. доллар буюу 2.0 хувийг тус тус эзэлж, эдгээр нь нийт экспортын дүнгийн 94.7 хувийг эзэлжээ (Хавсралт 3).
- Хар тугалганы хүдэр, баяжмал, төмрийн хүдэр, зэсийн баяжмал, цайрын баяжмал, түүхий нефтийг 100.0 хувь,
- Чулуун нүүрсний 98.3 хувийг БНХАУ-д;
- Үхэр адууны боловсруулсан ширний 61.2 хувийг БНХАУ-д,
- Ямааны самнасан ноолуурын 77 хувийг Итали-д;
Ямааны угаасан ноолуурыг 99.9 хувь БНХАУ-д тус тус экспортолжээ. Дээрх нэрийн бараа экспортын нийт дүнгийн 85 хувийг эзэлсэн байна.
Дэлхийн 60 оронд бараа экспортолсноос
- БНХАУ-д 92.5 хувь,
- Швейцарт 3.6 хувь,
- БНСУ-д 1.2 хувь тус тус ногдож, нийт экспортын 97 хувийг дээрх орнууд эзэлжээ.
Импортоор нийт 2660.4 сая ам.долларын бараа, түүхий эд оруулсан нь 2022 оны мөн үеэс 720.7 сая ам.доллараар буюу 13 хувиар өссөн байна.
Импортолсон барааны
- 96 хувийг валютын төлбөртэй худалдаа,
- 1.0 хувийг гадаадын зээлийн хөрөнгөөр нийлүүлсэн бараа,
- 0.3 хувийг гадаадын тусламжийн бараа,
- 1.6 хувийг гадаадын хөрөнгө оруулалтаар нийлүүлсэн бараа,
- 0.2 хувийг реимпорт эзэлжээ.
Импортолсон барааны нийт дүнд машин механик тоног төхөөрөмж ба эд анги, цахилгаан хэрэгсэл, тэдгээрийн сэлбэг 483.9 сая ам.доллар буюу 18.2 хувь, эрдэс бүтээгдэхүүн 644.6 сая ам.доллар буюу 24.2 хувь (үүний дотор нефтийн бүтээгдэхүүн 562.5 сая ам.доллар буюу 87.3 хувь), мал амьтан, ургамлын гаралтай бүтээгдэхүүн, хүнсний зүйл 287.8 сая ам.доллар буюу 10.8 хувь, авто агаарын тээврийн хэрэгсэл тэдгээрийн эд анги 507.9 сая ам.доллар буюу 19.1 хувь, үндсэн төмөрлөг болон түүгээр хийсэн бүтээгдэхүүн 208.8 сая ам.доллар буюу 7.8 хувь, химийн болон түүнтэй холбоотой үйлдвэрийн бүтээгдэхүүн 153.2 сая ам. доллар буюу 5.8 хувийг тус тус эзэлж, эдгээр бүтээгдэхүүнд нийт дүнгийн 82.4 хувь ногдож байна (Хавсралт 3).
Олон улсын санхүү, эдийн засгийн байгууллага, хандивлагч орны тусламжаар 8.3 сая ам.долларын бараа импортолсноос барааг гарал үүслийн орноор авч үзэхэд Япон-д 23.3 хувь, БНХАУ-д 19.1 хувь, АНУ-д 15.2 хувь, Турк-д 14.7 хувь тус тус ногдож байна. (Хавсралт 9).
Тусламжийн барааг хандивлагч байгууллага, орноор нь ангилвал АНУ-д 63.4 хувь, Япон-д 13.4 хувь, БНСУ-д 8.1 хувь ногдож байна.
Олон улсын санхүү эдийн засгийн байгууллага, хандивлагч орны зээлээр 27.7 сая ам.долларын барааг тус улсад нийлүүлснээс барааг гарал үүслийн улсаар нь авч үзвэл БНХАУ-д 68.4 хувь, Австри-т 10.3 хувь, Энэтхэг-т 8.3 хувь, Австрали-д 5.6 хувь тус тус ногдож байна. (Хавсралт 10).
Нийт зээлийн барааг Засгийн газрын шугамаар оруулж иржээ. Уг зээлийн 73.7 хувийг БНСУ-с, 12.3 хувийг Энэтхэг-с, 10.0 хувийг Австри-с тус тус олгожээ.
Нийт 42.7 сая ам.долларын бараа гадаадын хөрөнгө оруулалтаар нийлүүлэгдсэнээс барааг гарал үүслийн улсаар авч үзвэл ОХУ-д 83.1 хувь, БНХАУ-д 7.4 хувь тус тус ногдож байна. (Хавсралт 12).
Манай улс дэлхийн 130 орноос гарал үүсэлтэй бараа импортолсноос БНХАУ-д 38.7 хувь; ОХУ-д 26.7 хувь; Япон-д 7.7 хувь; БНСУ-д 4.3 хувь; АНУ-д 3.1 хувь тус тус ногдож байгаа нь нийт импортын дүнгийн 80.5 хувийг эзэллээ гэж ГЕГ-аас мэдээлэв.
