Оросын сөнөөгч онгоц Хар тэнгисийн дээгүүр Польшийн Хилийн харуулын эргүүлийн онгоцыг саатуулсан тухай Польшийн хилийн албаны вэбсайтад нийтэлжээ.
Энэ сарын 5-ны баасан гаригт Румын улсын удирдлага дор явагдсан "Фронтекс" ажиллагааны үеэр "Турболет L-410" онгоц Хар тэнгис дээгүүр эргүүлийн нислэг үйлдэж байх үед энэ үйл явдал болсон гэж хилийн албанаас мэдээллээ.
"Оросын хоёр хөдөлгүүртэй Су-35 сөнөөгч онгоц Румыны тогтоосон ажиллагааны бүсэд ямар ч радио холбоогүйгээр нисч, улмаар түрэмгий, аюултай маневр хийсэн. Ингэхдээ Польшийн нисэх онгоц руу аюулгүйн зай барихгүйгээр гурван удаа ойртсон" гэж тайланд дурджээ.
Тэдний хэлснээр Оросын сөнөөгч онгоцны маневраас шалтгаалан Польшийн хилчдийн онгоцны багийнхан онгоцны удирдлагаа алдаж, өндрөө алдаж эхэлсэн байна. Гэсэн хэдий ч дараа нь онгоц аюулгүй газардаж чадсан байна.
Эх сурвалж: Лента.ру
