Энэ жил 92 насыг зооглож буй Berkshire Hathaway компанийн ТУЗ-ийн дарга Уоррен Баффет одоохондоо тэтгэвэрт гарах магадлал тун бага болохыг Market Watch сайт орон нутгийн цагаар 4-ний өдөр мэдээлэв.
Berkshire Hathaway компаниас жил бүр уламжлал болгон зохион байгуулдаг хөрөнгө оруулалтын хурал энэ сарын 6-ны өдөр болох юм. 1997 оноос хойш тус компанийн захирлуудын зөвлөлд ажиллаж байгаа Рон Олсен тус хурлыг угтан АНУ-ын Небраска мужийн Омаха хотод болсон хувьцаа эзэмшигчдийн уулзалтад оролцох үеэрээ “Компани ойрын хугацаанд удирдлагын түвшний өөрчлөлт хийх ямар нэгэн төлөвлөгөө байхгүй" хэмээн онцлон тэмдэглэсэн байна. Омаха бол Баффетийн төрсөн газар бөгөөд насан туршдаа амьдарсан хот нь юм.
Олсен Баффетийн тухай хэлэхдээ “Түүний эрч хүч гайхалтай сайн байгаа. Грег (Грег Абел, Berkshire Hathaway компанийн дэд ерөнхийлөгч) ойрын хугацаанд Баффетын суудалд очихгүй” хэмээн өгүүлэв. Түүнчлэн Баффетийн "баруун гар" гэгддэг энэ жил 99 настай Чарли Мунгер Berkshire Hathaway компанийн дэд захирлын талаар хэлэхдээ "Түүний тархи яг л өмнөх шигээ сайн ажиллаж байгаа" гэжээ.
Баффет хоёр жилийн өмнө дэд ерөнхийлөгч Абелийг өөрийн залгамжлагчаар тодруулсан юм. Баффет 2006 онд буюу 75 нас хүрсэн жилээ хувьцаа эзэмшигчдэдээ “Хэрвээ компанийг удирдах чадварт ямар нэгэн асуудал үүссэн тохиолдолд удирдах зөвлөлийн зүгээс намайг компанийг орхих үүдийг нээж өгөх нь тодорхой” хэмээн хэлж байсан удаатай бөгөөд тэр цагаас хойш залгамж халаагаа өгөхөөр бэлтгэлээ базаасаар буй бололтой.
Дэд ерөнхийлөгч Абел нь Berkshire Hathaway компанийн даатгалын бус бизнесийг удирддаг юм. “2008 оноос хойш Баффеттай нягт хамтран ажиллаж ирсэн Абелд тус компанийн захирлуудын зөвлөл бүрэн итгэлтэй байдаг” хэмээн Олсен цохон тэмдэглэв. Абел 2018 онд дэд ерөнхийлөгчийн албан тушаалд очсон юм.
Одоогийн байдлаар Баффет нь ТУЗ-ийн дарга, гүйцэтгэх захирал, хөрөнгө оруулалтын ахлах захирал зэрэг албыг хашдаг байна. Компанийн зүгээс түүнийг тэтгэвэрт гарсан тохиолдолд эдгээр албан тушаалууд дээр тус тусд нь захирлууд томилох төлөвлөгөөтэй байгаагаа олон жилийн турш мэдэгдсээр ирсэн билээ.
Харин компанийн ерөнхийлөгчийн суудлыг Баффетын ууган хүү Ховард Баффет өвлөж авах магадлал өндөр байгаа бол гүйцэтгэх захирлын албан тушаалыг дэд ерөнхийлөгч Абел хүлээн авах төлөвтэй байна. "Охин компаниудын бие даасан байдлыг аль болох нэмэгдүүлж, итгэлцлийн соёлыг хадгалах нь Абелийн хамгийн чухал ажил үүрэг байх болно" гэж Олсен дурдав.
Ройтерс агентлагийн мэдээлснээр Berkshire Hathaway компаниас зохион байгуулдаг хөрөнгө оруулагчдад зориулсан 59 дэх удаагийн хурал нь энэ сарын 6-ны өдөр зохион байгуулагдах ба олон мянган хөрөнгө оруулагчид оролцох төлөвтэй байгаа юм. Тус арга хэмжээнд ТУЗ-ийн дарга Баффет, дэд ерөнхийлөгч Мунгер нар таван цагийн турш хувьцаа эзэмшигчдийн асуултад хариулах гэнэ. Асуулт, хариултын гол сэдэв сүүлийн үед АНУ-ын хөрөнгийн зах зээлийг донсолгож буй банкны хямрал, эдийн засгийн уналтын асуудал байх төлөвтэй байгаагийн хажуугаар Баффет тэтгэвэрт гарах төлөвлөгөөнийхөө талаар олон нийтэд мэдэгдэх эсэх дээр Wall Street анхаарал хандуулж буй юм.
Эх сурвалж: Hankyung
