УИХ-ын чуулганы нэгдсэн хуралдаанаар Үндсэн хуулийн нэмэлт өөрчлөлтийн төслийг хэлэлцэх үед УИХ-ын гишүүн, Барилга, хот байгуулалтын сайд Ц.Даваасүрэн сонгуулийн тогтолцоог пропорционал болгохыг дэмжихгүй гэдгээ илэрхийллээ.
Тэрбээр "Үндсэн хууль бол эрх мэдлийн дээд хязгаар учраас үүнийг хөдөлгөнө гэдэг бол эрх мэдлийн хуваарилалтыг өөрчилдөг. Мөн бид төр, ард түмний гэрээ юм гэж ярьдаг. Тийм учраас төрийн ч, ард түмний ч хувь заяаны асуудал юм. Би Үндсэн хуулийг ойр ойрхон өөрчлөхийг дэмждэггүй.
Нэгдүгээрт, пропорционал тогтолцоог дэмждэггүй. Намын жагсаалтын ард хүн сонгогдохыг дэмжихгүй.
Хоёрдугаарт, сонгуулийн тогтолцоог өөрчлөхөөс гадна тоо нэмж байгаа асуудлыг иргэд хэр хүлээж байгаа вэ гэдэгт эргэлзэж байна. Иргэд дэмжихгүй байгаа.
Одоо манайхан санал гээгдэж байна гээд ярьдаг. Энэ чинь их сонин. Олон ургалч үзэлтэй зах зээлийн тогтолцоонд 100 хувийн санал авдаг гишүүн нэг ч гарч ирээгүй, цаашид ч гарч ирэхгүй. Саналаа өгөөгүй хүн нь гишүүн болчхоор гишүүн болгохын төлөө саналаа өгсөн олонх дургүйцнэ.
Намын жагсаалтын ард нөгөө янз бүрийн юманд холбогддог, ард түмний итгэл алдсан хулгарууд бол ороод л ирнэ.
Би пропорционал тогтолцоог аюултай гэж үзэж байгаа. Яагаад гэвэл, пропорционал тогтолцоотой улс орнуудад гаднын улс орнуудын бодлогыг дэмжсэн гэдэг юм уу, үндэсний бодлоготой, шашны урсгалыг дэмжсэн намууд бий болдог.
2014 онд бид нар Норвегид айлчилсан. Норвегийн парламентын дэд дарга нь пакистан хүн байсан. Яагаад гэвэл лалын намын, лалын цагаачид нь дэмжчихсэн. Тэгэхээр юу ч болж болно гэж бодох хэрэгтэй. Жишээлбэл, урд юм уу хойд хөршид томоохон хөдөлгөөн гараад сая сая дүрвэгсэд ирж болно. Хэдэн жил ч манайд амьдарч болно. Иргэн ч болж мэднэ. Гэтэл бид пропорционал сонгуулийн тогтолцоотой байх юм бол яг энэ Норвеги шиг балрах байхгүй юу. Хамгийн аюултай юм нь энэ.
Мөн Засгийн газар нь тогтворгүй болдог, олон нам орж ирдэг учраас" гэлээ.
