УИХ, Засгийн газрын гишүүдийн хэлсэн ярьсан нь хийж буй үйлдэлтэйгээ эсрэгцэж байдгийн бодит жишээ бол ЦХХХ-ны сайд Н.Учрал болов.
Түүнийг Их Засаг дунд сургуулийн томоохон хувьцаа эзэмшигч гэдгийг хэн бүхэн мэднэ. Тус сургууль ч нэгдүгээр ангиас нь англи хэл заадаг гүнзгийрүүлсэн хөтөлбөртэй хэмээн элсэлтийн зардаа онцлон бичсэн байдаг.
Гэтэл УИХ-ын нэгдсэн чуулганаар өчигдөр Боловсролын ерөнхий хуулийн хэлэлцүүлгийг хийх үеэр УИХ-ын гишүүн, Засгийн газрын сайд Н.Учрал өөрийн байр суурийг илэрхийлсэн юм. Тэрээр, Кембрижийн хөтөлбөр яагаад зургадугаар ангиас хэрэгждэг вэ гэхээр 1-6 дугаар анги хүртэл үндсэн эх хэлийг нь эзэмшүүлээд 6 дугаар ангиас нь Кембрижийн стандартын дагуу оруулдаг. Би өөрөө Британийн магадлан итгэмжлэлд 4 жил шинжээчээр ажиллаад энэ хөтөлбөрийг оруулж ирж байсан. Кембрижийн хөтөлбөр ч бай, IB хөтөлбөрт бай 30 хувьд нь үндэсний онцлогоо шингээ гэдэг. Кембриж бол 100 хувь англи биш. 4-өөс дээш хичээлийг энэ хөтөлбөрөөр англи хэл дээр заахыг хэлдэг. Энэ чинь гадаадын их дээд сургуулийн тэтгэлэг хөтөлбөрт хамрагдах боломж олгодог болохоос зөвхөн англи хэл заах биш.
Тийм учраас хуулинд тусгайлан англи хэл гэж авч үзэх нь академик эрх чөлөөнд халдсан буюу үндэсний уламжлал, боловсролд сөргөөр нөлөөлөх аюултай. Багшаа дэмжсэн бодлогыг хэрэгжүүлж байж, түвшин түвшинд ахиц гарна. Суралцая гэвэл янз бүрийн видео хичээл аваад суралцах боломж нь байгаа ” гэсэн мэдээлэл өгсөн юм.
Өөрөөр хэлбэл, хувийн сургуулиуд нэгдүгээр ангиас заахаар сурталчилгаа явуулдаг ч улсын сургуульд оруулбал үндэсний уламжлал, боловсролд сөргөөр нөлөөлөх аюултай хэмээн үзэж байгааг хэрхэн ойлгох вэ.
