Хатаасан жимс зүгээр ч нэг амны зугаа биш. Шинэхэн жимс жимсгэнэтэй адил аминдэм, эрдэс бодисын эх үүсвэр болдог. Мөн ислэгээр баялаг, холестерин агуулдаггүйгээрээ онцлогтой.
Хатаасан жимс нь шинэ жимстэй харьцуулахад жин багатай ч ашигтай бодисын хэмжээ нь хангалттай өндөр байдаг байна. Тиймээс хоол зүйчид өдөр тутмын хүнсэндээ нэмэлтээр хэрэглэхийг зөвлөдөг. Тухайлбал, зууш салат, бялуу болон бусад төрлийн десерт, тараг, уух зүйлсдээ чавга, цангис, чангаанз, самраас нэмж хэрэглэвэл таны идэх гэж буй хоол хүнсийг илүү амттай бас баялаг болгоно.
Хэрэглэгчдийн дунд зөвхөн орос үзэм, чавга л сайн гэх ойлголт байдаг ч эдгээр жимсний хамгийн сайн сортууд нь Америк, Аргентин, Турк, Вьетнам, Иран зэрэг жимс самрын өлгий нутгуудад байдгаараа онцлогтой.
Самар, жимсийг багахан идэхэд л энерги, эрдэс бодисоор хангаж чадна. Жишээ нь, спортоор идэвхтэй хичээллэдэг хүмүүс, тамирчид өндөр ачаалалтай дасгал хийсний дараа хатаасан жимс идэж, глюкозын нөөцөө богино хугацаанд хангахаас гадна өвдөлт бууруулж, сэтгэл санааг өргөхөд нөлөөлдөг эндорфин даавар ялгаруулахад тусалдаг байна.
ТЭГВЭЛ САМАР ЯМАР АЧ ТУСТАЙ ВЭ?
Самар идэхээр ухаантай болно гэх яриа нийгэмд дэлгэрчээ. Тэгвэл алмонд буюу бүйлс самар ямар ач холбогдолтой вэ?
Бүйлс ханаагүй тосны хүчил, кальци, магни, В6 аминдэм, ислэгээр баялаг бөгөөд цусан дахь холестериний хэмжээг бууруулах, цус багадалт, зүрх судасны өвчин, бөөрний өвчнөөс урьдчилан сэргийлэхэд тусалдаг. Мөн хорт хавдраас сэргийлэх ач холбогдолтой.
Бүйлс мөн жингээ хасахад тань эерэг нөлөөтэй бөгөөд арьсны эрүүл мэндэд тустай, чихрийн шижин өвчний эрсдэлийг бууруулдгаараа онцлогтой юм.
ЦАНГИС ЖИМС ХӨГШРӨЛТИЙГ УДААШРУУЛДАГ
Халуун хүйтэн харшсан хаврын энэ өдрүүдэд даарч хөрснөөс болж цистит тусах эрсдэл нэмэгддэг. Харин цангис жимсийг бөөр, шээсний замын халдварт өвчнийг анагаахад эртнээс хэрэглэж иржээ. Учир нь энэ жимсэнд агуулагдах флавоноидууд давсагны хананд нян хуримтлагдахаас сэргийлж, шээсний замын халдварыг эмчлэхэд тусалдаг байна. Флавоноидууд нь антиоксидант, үрэвслийн эсрэг, хорт хавдрын эсрэг үйлчилгээтэй.
Мөн цангис жимсний ач тусыг тоолоод баршгүй. Тухайлбал,
- Антиоксидантаар баялаг тул хөгшрөлтийг удаашруулна.
- Зүрх судасны өвчнөөс хамгаална. Учир нь цусан дахь холестерины хэмжээг бууруулж, даралт тогтворжуулах ач холбогдолтой.
- Ходоодны шархлаа, хорт хавдар үүсгэдэг бактери болох хеликобактер пилоригийн өсөлтийг сааруулах үйлчилгээтэй.
- Мөн антиоксидант, үрэвслийн эсрэг, хорт хавдрын эсрэг, ялангуяа түрүү булчирхайн хорт хавдраас сэргийлдэг байна.
