Өмнөд Солонгос бол дэлхийн хэмжээний томоохон зэвсэг үйлдвэрлэгч юм. Хэрэв Өмнөд Солонгос үнэхээр Украинд цэргийн техник, зэр зэвсэг нийлүүлэх түншүүдийн нэг болбол бусад хандивлагчдад тулгараад байгаа хүнд нөхцөл байдлыг нухацтай хөнгөвчлөх болно.
Саяхныг хүртэл БНСУ Украинд шууд зэвсэг нийлүүлэхээс татгалзаж, зөвхөн хүмүүнлэгийн тусламжаар хязгаарлагдаж байсан.
Гэсэн хэдий ч Солонгост үйлдвэрлэсэн эд анги ашигладаг “Krab” өөрөө явагч гаубицыг Украинд шилжүүлэхийг Сөүл зөвшөөрөв. "Krab"нь Солонгост үйлдвэрлэсэн явах эд ангиудыг ашигладаг.
Өөр нэг жишээ бол АНУ-д хагас сая 155 мм-ийн сум нийлүүлсэн явдал юм. Энэ тохиролцоог өнгөрсөн дөрөвдүгээр сард хийсэн.
Сөүлийг Киевт цэргийн шууд тусламж үзүүлэх явцад аль болох бага оролцуулахын тулд зэвсэг нийлүүлэх ийм чамин аргыг сонгож байгаа юм. Вашингтон украинчуудад зэвсгийг идэвхтэй нийлүүлж, нөөцөө шавхаж байгаа ийм үед Солонгосын 155 мм-ийн сум америкчуудад асуудлаа шийдэхэд нь туслах нь гарцаагүй.
Солонгосчууд Польшид зэвсэг нийлүүлдэг. Тухайлбал, К-2 танк, К-9 өөрөө явагч буу. Үүнийг Украинд үзүүлэх цэргийн тусламж гэж нэрлэж болохгүй, гэхдээ эдгээр нийлүүлэлт нь Польшуудад Т-72 танк болон өөрөө явагч "Krab"-уудыг Украины Зэвсэгт хүчинд шилжүүлэх боломжийг олгодог.
Өмнөд Солонгосын ерөнхийлөгч Юн Сок Ёол өнгөрсөн баасан гарагт ОХУ-ын Украинд хийж буй түрэмгийллийг амжилтад хүргэхгүйн тулд бүх зүйлийг хийх ёстой гэж мэдэгдсэн, мөн Сөүлээс Киевт цэргийн тусламж үзүүлэхийг үгүйсгээгүй.
Тэрээр АНУ-д айлчлах үеэрээ Харвардын их сургуульд үг хэлэхдээ "Ийм халдлага хэзээ ч бүтэхгүй гэдгийг бид нотлох ёстой" гэж мэдэгдсэн юм.
"Ёнхап" агентлагийн мэдээлснээр, Өмнөд Солонгосын Гадаад хэргийн нэгдүгээр орлогч сайд Чан Хо Жин удахгүй Орост очно. Түүний айлчлалын зорилгыг Украины дайнд Өмнөд Солонгосын байр суурь өөрчлөгдсөнийг Москвад тайлбарлах явдал гэж нэрлэж байна. Энэ байр суурь үнэхээр өөрчлөгдөх эсэх, хэр хэмжээгээр өөрчлөгдөх нь тодорхойгүй байгаа ч Сөүл цэргийн хангамжийн асуудлыг шийдвэл Украины төлөө их зүйлийг хийж чадна.
Юуны өмнө энэ нь сумтай холбоотой. Солонгосын "Poongsan" корпораци нь танк, гаубиц зэрэг бүх төрлийн сум үйлдвэрлэх дэлхийн тэргүүлэгч компаниудын нэг юм.
Үүнээс гадна Өмнөд Солонгос хүнд хуягт машин үйлдвэрлэдэг бөгөөд К-2 байлдааны танкууд нь өндөр үнэлэгдэж, олон оронд экспортлогддог. Солонгос электроникийн үйлдвэрлэлээр тэргүүлэгчдийн нэг, мөн нисэхийн салбар идэвхтэй хөгжиж байна.
Хөрш БНАСАУ-тай харилцах харилцаанаас болж байнгын хурцадмал байдалд амьдардаг БНСУ Азийн бусад олон орноос илүү дайнд бэлтгэгдсэн байдаг. Энэ байдлаараа ийм том хэмжээний мөргөлдөөнд тийм ч бэлэн биш байсан Европын орнуудаас ялгарч байна. Иймээс барууныхан Ази дахь ийм түншээ шууд цэргийн хангамжид татан оролцуулах нь ашигтай юм.
Эх сурвалж: ВВС
