Ням гарагт Дэлхийн Эдийн засгийн Форум 800 гаруй компанийн хүрээнд хийсэн судалгааныхаа дүгнэлтийг танилцуулжээ. Судалгаагаар ирэх таван жилийн хугацаанд дэлхийн хөдөлмөрийн зах зээлээс 14 сая ажлын байр арчигдана гэсэн тоо гарсан байна.
Тэдний боловсруулсан судалгааны дүгнэлтээс үзвэл 2027 он гэхэд хөдөлмөрийн зах зээлд нийт 69 сая шинэ ажлын байр бий болох бол зах зээлээс 83 сая ажлын байр арчигдана гэсэн юм. Ингэснээр шинээр бий болох ажлын байр хийгээд зах зээлээс арчигдах ажлын байрны тоонд 14 саяын зөрүү гарч байгаа ажээ. 14 сая ажлын байр гэдэг нь өнөөгийн зах зээл дэх нийт ажлын байрны 2 хувьтай тэнцэх юм.
Дэлхийн Эдийн засгийн Форумаас тооцоолсноор дэлхийн улс орнууд уламжлалт эрчим хүчнээс татгалзаж, сэргээгдэх эрчим хүч рүү шилжиж байгаа нь хөдөлмөрийн зах зээлд олон мянган шинэ ажлын байрыг бий болгох бол эдийн засгийн өсөлт удаашрах, инфляц өсөх нь ажлын байр арчигдах үндэс болно гэжээ.
Мөн тэдний тооцсоноор 2027 он гэхэд дата шинжээч, дата судлаачид, машин сургалтын мэргэжилтнүүд болон цахим аюулгүй байдлын мэргэжилтнүүдийн орон тоо 30 хувиар өснө гэсэн байна.
Эх сурвалж: CNN
