Ням гарагт CNN сувгаас мэдээлснээр Хятадын хотуудад оршин суугаа 5 залуу иргэний нэг нь ажилгүй байна гэжээ. Улмаар Бээжин хотын удирдлагаас санал болгосноор тэд 300,000 ажилгүй, залуу иргэнийг 2-3 жилийн хугацаатайгаар алслагдмал бүсүүд рүү явуулж болно гэсэн юм.
Тэдний ийн санал болгох болсон шалтгаан нь хамгийн сүүлд гаргасан статистикаар тус улсын хот суурин газар оршин суугаа 16-24 насныхны дунд ажилгүйдлийн түвшин 19.6 хувьтай гарсантай холбоотой ажээ. Бараг л 20 хувь шүргэсэн энэ үзүүлэлт нь тус улсын түүхэн дэх хоёр дахь өндөр үзүүлэлт болж байгаа юм.
CNN сувгаас тооцоолсноор хот тосгодод оршин суугаа залуучуудын 19.6 хувь нь ажилгүй байна гэдэг ойролцоогоор 11 сая иргэнийг хамарсан асуудал гэнэ.
Тийнхүү залуучууд алслагдмал бүсүүдэд очиж ажиллахгүй аваас тус насны иргэдийн хүрээн дэх ажилгүйдлийн түвшин цаашид ч өсөх төлөвтэй байгаа юм. CNN сувгаас тайлбарласнаар залуучуудын дунд ажилгүйдэл нэмэгдэж байгаа нь Хятадын эдийн засгийн өсөлт удааширсантай холбоотой гэсэн байна.
Эх сурвалж: CNN
