Энхтайваны гүүрний зүүн талд Дунд гол урсдаг хэсэг газарт “Эм энд Жи” констракшн гэх компани 11.8 га газрын зөвшөөрөл авч эцэстээ 25 давхар орон сууцны хороолол барьж эхэлсэн байдаг.
Ерөнхий сайд Л.Оюун-Эрдэнэ "Авлига хороолол" гэгддэг уг хороололтой холбоотой асуудлыг шалгаж, холбогдох мэдээллийг олон нийтэд гаргаж танилцуулах чиглэлийг Барилга хот байгуулалтын сайдад өгсөн талаар бид өмнө нь мэдээлж байсан. Тэгвэл эл асуудал эцэслэгдээгүй байхад Усан парк барина гээд орон сууцны хороолол барьж буй “Эм энд Жи” констракшний барилга дээр ноцтой осол гарсан байна.
Цагдаагийн байгууллагад 2023 оны дөрөвдүгээр сарын 30-ны өдрийн 23 цаг 30 минутад Нийслэлийн Хан-Уул дүүргийн тавдугаар хорооны нутаг дэвсгэрт баригдаж буй барилга дээр “Осол гарч хүн гэмтсэн байна” гэх дуудлага, мэдээлэл бүртгэгдсэн байна.
Тус дуудлага, мэдээллийн дагуу дүүргийн цагдаагийн газрын Нэгдүгээр хэлтсээс шалгахад тус барилгад цутгалт хийх үед цутгалт хийж байсан техникийн помпын хоолой хугарч 19 настай, эрэгтэй “М”-ийн дээр унасны улмаас гэмтсэн хэрэгт мөрдөн шалгах ажиллагаа явуулж байна.