Засгийн газрын бондыг Монголын хөрөнгийн биржээр энэ онд арилжаалахаар төлөвлөж байгааг Сангийн яамны Санхүүгийн зах зээл, даатгалын газрын захирал Л.Сонор “Хөрөнгө оруулагч үндэстэн” чуулганы үеэр хэлэв.
Манай улс 2012 онд Засгийн газрын бондыг төв банкиар дамжуулан зөвхөн арилжааны банкуудад худалдаалж байсан бол 2014 оноос Хөрөнгийн биржээр ард иргэд, аж ахуйн нэгжүүд зарж эхэлсэн. Харин сүүлийн зургаан жилийн хугацаанд буюу 2017 оноос Засгийн газрын бондыг огт арилжаалаагүй. Тэгвэл Л.Сонорын хэлж буйгаар, бондын арилжааг ойрын хугацаанд эхлүүлэх нь.
Төсвийн алдагдал, улирлын чанартай орлогын цоорхойг Засгийн газрууд нөхөх үүднээс богино хугацаат үнэт цаас гаргаж ирсэн. Дотоодын зах зээлд хамгийн эрэлттэй өрийн бичиг бол Засгийн газрын бонд байдаг. Ашиг нь тодорхой, эрсдэл багатай гэж хөрөнгө оруулагчид үздэг учраас хамгийн их чих тавьдаг бүтээгдэхүүн. Арилжааны банкны суурь хүүг Төв банкны бодлогын хүү тодорхойлдог бол Засгийн газрын бондын хүү нь хөрөнгийн зах зээлийн суурь хүү болдог. Сангийн сайдаас Үнэт цаасны компаниуд болон хөрөнгийн зах зээлийн оролцогчид хамгийн их асуудаг асуулт нь Засгийн газрын бондыг арилжаалах эсэх. Тэгвэл Монголын хөрөнгийн бирж болон холбогдох дэд бүтцийн байгууллагатай бонд арилжаалах талаар Сангийн яам ярилцаж эхэлжээ.
Засгийн газрын хувьд гадаад, дотоодын өр төлбөрийн дарамт өндөр байгаа нь бонд гаргах эсэхийг хойшлуулах гол шалтгаан болж ирсэн. Эдийн засгийн судалгаа, эрдэм шинжилгээний хүрээлэнгийн судалгаагаар, Засгийн газрын өр 30 их наяд төгрөгт хүрч, ДНБ-ий 60 хувийг давсан. Жил бүр хүүнд нь 800 тэрбум төгрөг төлж байна гэж мэдэгдсэн. Засгийн газрын нэрлэсэн өр 2015 оноос хойш хоёр дахин өссөн байна.