Apple компанид ажиллаж байсан нэгэн этгээд 8 жилийн хугацаанд хоёр ханган нийлүүлэгчийн хамтаар тус компаниас 17 сая ам.доллар завшсан нь илэрч, гурван жилийн хорих ял авчээ.
АНУ-ын томоохон хэвлэл мэдээллийн хэрэгслүүдийн орон нутгийн цагаар 28-ны өдөр мэдээлснээр, Калифорни мужийн холбооны дүүргийн шүүхээс Apple компанийн ажилтан асан Дирендра Прасад залилан болон бусад холбогдох хэргээр гурван жилийн хорих ял оноохоор болсон тухай онцлов.
Прасад нь 2008-2018 оны хооронд Apple-ийн Олон улсын үйлчилгээний нийлүүлэлтийн хэлтэст хангамжийн менежерийн албан тушаалыг хашдаг байжээ. Тэрээр 2011 оноос эхлэн найман жил гаруй хугацаанд хоёр ханган нийлүүлэгчтэй хамтран 17 сая гаруй ам.долларыг хувьдаа завшсан нь ил болсон юм. Тэд хүргэлтийн үнийг нэмэгдүүлэх юм уу худалдан авалт хийгээгүй бараа бүтээгдэхүүн дээр зарлагын баримт үйлдэх зэргээр их хэмжээний мөнгийг шамшигдуулсан байна. Мөн эдгээр компаниудаас мөнгө, үнэт зүйлс зэргийг хахууль болгон авч байжээ.
Өнгөрсөн жил яллагдагчаар татагдсан Прасад гэм буруугаа хүлээн зөвшөөрч, ийнхүү гурван жилийн хорих ял авчээ. Тэрээр Apple компанид учруулсан 17 сая ам.долларыг төлж хохирлыг барагдуулахаас гадна Үндэсний татварын албанд 1,87 сая ам.долларын татварыг мөн төлөх ёстой болж буй аж. Түүнчлэн түүний 5,4 сая ам.долларын эд хөрөнгийг хураах шийдвэр гарснаас гадна 8,1 сая ам.долларын торгууль ногдуулжээ.
Прокуроруудын зүгээс мэдэгдсэнээр “Apple компани түүнд тус албан тушаалыг хашиж байхад нь бие даан шийдвэр гаргах эрх олгосон боловч тэрээр ийнхүү эрх мэдлээ урвуулан ашигласан" хэмээн цохон тэмдэглэсэн байна. Харин Apple компани уг шийдвэртэй холбогдуулан ямар нэгэн тайлбар хийгээгүй юм.
Эх сурвалж: Asiae
