Төрд ажиллаж буй хэнбугай ч хууль зөрчиж болохгүй, зөрчсөн бол тэр “шимэгч”-ийг төрөөс шүүрдэнэ гэж Засгийн газраас мэдэгдээд багагүй хугацаа өнгөрчээ. Гэвч хэрэг дээрээ засгийн Шүүр ажиллагаа төрд байгаа нөхдийг алагчлаад байна уу гэж харахад хүрээд байна. Жишээ татъя.
Хөгжлийн банкны гүйцэтгэх захирал Н.Мандуул өөрийгөө уг албан тушаалд ковидын хуулиар томилогдсон учраас чөлөөлөгдөх учиртай, гүйцэтгэх захирлын сонгон шалгаруулалт явагдах ёстой гэдгийг хэлсэн. Мөн энэ оны нэг болон гуравдугаар сард ажлаас чөлөөлөгдөх өргөдлөө өгсөн гэдгээ сошиал хуудсаараа дамжуулаад мэдэгдчихсэн.
Тэгэхээр энэ тохиолдолд Шүүр ажиллагаа үнэхээр бодитой хэрэгжиж байгаа бол Хөгжлийн банкны ТУЗ-ийн гишүүд Н.Мандуулын удаа дараагийн өргөдлийг хүлээн авч, түүнийг чөлөөлөх ёстой л доо. Гэтэл ТУЗ нүдэн балай, чихэн дүлий царайлаад байж байна.
Хөгжлийн банкны тухай хуулийн 20 дугаар зүйлд Төлөөлөн удирдах зөвлөлийн бүрэн эрхийг тусгасан байдаг. Тухайлбал, 20.1.4-т Хөгжлийн банкны гүйцэтгэх захирлыг сонгон шалгаруулах журам батлах, түүнтэй гэрээ байгуулах, дүгнэх; эрхтэй гэж заасан байгаа юм.
Тэгэхээр Хөгжлийн банкны ТУЗ-ийн нэр бүхий 9 гишүүн Засгийн газрын Шүүр ажиллагааг хэрэв хүлээн зөвшөөрч байгаа бол гүйцэтгэх удирдлагынхаа удаа дараа тавиад буй өргөдлийг хэлэлцэх ёстой. Энэ бол ТУЗ-ийн хийх ёстой, анхаарах ёстой асуудал шүү дээ. Гэтэл төсвөөс цалинждаг ТУЗ хийх ёстой ажлаа хийхгүй байгаа нь шүүмжлэхээс өөр аргагүй юм.
Shilen.gov.mn сайтад байршсан мэдээллүүдээс Хөгжлийн банкны ТУЗ-ийн 9 гишүүний цалингийн дүнг харахад, ТУЗ-ийн дарга Ж.Ганбатын цалин 1,800,000 төгрөг байна. Харин бусад 8 гишүүний цалин тус бүр 1,500,000 төгрөг аж. Тэгэхээр Хөгжлийн банкны ТУЗ-ийн гишүүд нэг сард 13,800,000 төгрөг нэг жилд нийтдээ 165 сая 600 мянган төгрөгийн цалин авдаг байх нь. Энэ бол бага мөнгө биш. Татвар төлөгчдийн хуруу хумсаа хугалан байж төлдөг татварын мөнгө төсөвт орлого болон төвлөрдөгийг сануулахад илүүдэхгүй байх. Түүнчлэн хаа хаанаа хариуцлагатай хандах учиртай л даа.
Ковидын хууль нь хүчингүй болчихоод байхад, одоогийн захирлын өргөдлийг хүлээн авч, хэлэлцээд, сонгон шалгаруулалт зарлах ёстой атал ТУЗ огт хөдлөхгүй байгаа нь хачирхалтай. Зүй нь Засгийн газрын зүгээс үүнд анхаарал хандуулах ёстой ч эсрэгээрээ Хөгжлийн банкны гүйцэтгэх захирал, Сангийн сайд нарт ээлжит үүргээ өгөөд байж байх юм.
Б.МӨНХ