Хөгжлийн банкны гүйцэтгэх захирал Н.Мандуул ажлаасаа чөлөөлөгдөх өргөдлөө хоёр удаа холбогдох газруудад өгчээ. Гэвч түүний өргөдлийг хүлээн авч хүсэлтийг нь хэлэлцээд чөлөөлөөд явуулчихсангүй. Харин ч ажлаа үргэлжлүүлэн хий гэсэн үүрэг даалгаварыг Засгийн газрын хуралдаанаар өгчээ.
Тодруулбал, энэ 7 хоногийн Засгийн газрын хуралдаанаар Хөгжлийн банкны 2023 онд төлөх гадаад бондуудын эргэн төлөлтийг нарийвчилсан төлөвлөгөөний дагуу зохион байгуулж ажиллахыг Сангийн сайд Б.Жавхлан, тус банкны Гүйцэтгэх захирал Н.Мандуул нарт даалгажээ. Тэгэхээр Н.Мандуул захирал чөлөөлөгдөх биш эсрэгээрээ даалгавар авлаа гэж ойлгож болно.
Түүний хувьд өөрийгөө Ковидын хуулиар томилогдсон учраас чөлөөлөгдөх ёстой, сонгон шалгаруулалт явуулах ёстой гэсэн байр суурь илэрхийлээд байгаа. Гэсэн ч Засгийн газар энэ удаагийн хурлаараа түүнд даалгавар өгчээ. Н.Мандуулын хувьд өнгөрсөн хугацаанд Хөгжлийн банкнаас зээл авсан төрийн өмчит компаниудын өр төлбөрийг төр, төсвийн мөнгөөр төлж барагдуулах ёстой гэсэн байр сууринаас хандаж, эхнээс нь өр төлбөрийг нь барагдуулсан, нэрсийг нь ил гаргасан гээд сайн ажиллаж байгаа хэмээн үзэж буй.
Сануулахад, 2021 оны эцэст Монгол Улсын Хөгжлийн банкнаас олгосон нийт зээлийн 55.3 хувь нь чанаргүй ангилалд орсон байсан. 2022 оны нэгдүгээр сард 67 зээлдэгчийн 3.2 их наяд төгрөгтэй тэнцэх хэмжээний зээлийн багцын үлдэгдэлтэй байсан юм. Харин 2022 онд нийт 1,075.3 тэрбум төгрөгийн зээлийг зээлдэгчээр эргэн төлүүлсэн бөгөөд төлөгдсөн зээлийн 60,1 хувь нь чанаргүй, 12 хувь нь анхаарал хандуулах, 27.9 хувь нь хэвийн зээл байна.
