Вьетнамын нэгэн алдартай YouTuber “мөч уртасгах мэс засал” хийлгэж 8 орчим cантиметрээр өндөр болсон нь олны анхаарлыг татаад байна.
Тодруулбал Вьетнамын Postsen зэрэг орон нутгийн хэвлэлд мэдээлснээр YouTube суваг хөгжүүлэгч Коа Пуг (30 настай, жинхэнэ нэр нь Нгуен Ань Коа) хөлний ясыг сунгах буюу мөч уртасгах мэс засалд орсноор 167 сантиметр өндөртэй байж байгаад 175 сантиметр болжээ.
Коа бол 4.54 сая захиалагчтай алдартай YouTuber бөгөөд мэс засалд орсноос хойш эрүүл мэндийн байдал нь хэвийн гэдгээ харуулах үүднээс дүүтэйгээ авхуулсан зургаа өөрийн нийгмийн сүлжээнд тавьсан байна. Түүнчлэн тэрээр мэс засал хийлгэхээс өмнө найзаасаа бага зэрэг л өндөр нуруутай байсан бол өдгөө нэлээд өндөр харагдах болжээ.
Коа саяхан дүүтэйгээ авахуулсан зургаа нийгмийн сүлжээнд хуваалцжээ. Мэс засал хийлгэхээс өмнө дүүтэйгээ зэрэгцээд зогсоход түүний чихний орчим байдаг байсан бол мэс заслаас хойш мөн л дүүгээсээ өндөр болсон нь тус зурган дээрээс тодорхой харагдах аж.
167 см өндөртэй, эрэгтэйчүүд дундаа намхан нуруутайд тооцогдох Коа нь үүндээ тун их эмзэглэдэг байсан ба өнгөрсөн жил энэхүү мэс заслыг хийлгэхэд 75 орчим мянган ам.долларыг зарцуулсан байна. Тэрээр уг мэс заслыг АНУ-д очин, салбартаа шилдэгт тооцогддог гоо сайхны мэс засалч Кевинээр мэс засал хийлгэсэн ийнхүү амжилттай болсон аж.
Мэс засалч Кевиний GQ сэтгүүлд өгсөн ярилцлагаас харахад энэ төрлийн мэс засал нь хүнийг 3 инч (ойролцоогоор 8 см), 6 инч (ойролцоогоор 15 см) хүртэл нэмэгдүүлэх боломжтой байдаг аж. Уг мэс заслыг хийлгэх хүсэлтэй олон хүн 3 инчийг сонгодог ба уг ажилбарын үнэ 75 мянган ам.доллароор хэмжигддэг гэнэ.
Мөч уртасгах мэс засал нь гуяны ясыг нүхэлж тусгай төмөр савааг суулгадаг бөгөөд радио удирдлагаар өдөрт бага багаар хэдхэн миллиметрээр сунгаснаар хүнийг өндөр болгодог хэмээн тэрээр дурдсан байна. 6 инчээр уртасгах мэс заслын хувьд гуяны яснаас гадна шилбэний ясанд уг савааг суулгадаг ба уг ажилбарын өртөг 150 мянга орчим ам.доллар болдог гэнэ.
Түүнчлэн эмч нар, банк санхүүгийн ажилтнууд, жүжигчид, томоохон компаниудын гүйцэтгэх захирлууд, мэдээний хөтлөгч нарт мэс засал хийж байсан гэдгээ Кевин GQ сэтгүүлд ярьжээ. Сагсан бөмбөгчид хүртэл мөч уртасгах хагалгаанд орох хүсэлтэй байгаа хэмээн түүнд ханддаг бөгөөд тэрээр тамирчдад энэ төрлийн мэс засал хийхийг зөвлөдөггүй гэв. Тэрээр тамирчны амжилтад сөргөөр нөлөөлөхгүй гэх баталгааг бид гаршаж өгч чадахгүй учраас тамирчдад зөвлөдөггүй гэжээ.
Эх сурвалж: Hankyung
